„გალტ & თაგარტის“ მხარდაჭერით და „აზიის განვითარების ბანკის“ (ADB) მიერ განხორციელებული ინვესტიციით, მიკროსაფინანსო ორგანიზაცია „კრისტალმა“ საფონდო ბირჟაზე ორწლიანი გენდერული ობლიგაციები განათავსა. ინფორმაციას „საქართველოს ბანკი“ ავრცელებს.

მათივე ცნობით, „საქართველოს ბანკის“, როგორც თანაინვესტორის და „აზიის განვითარების ბანკის“, როგორც მთავარი ინვესტორის მხარდაჭერით, ფასიანი ქაღალდების ჯამური ღირებულება 25 მილიონ ლარს შეადგენს.

„აზიის განვითარების ბანკის“ მიერ განხორციელებული ინვესტიციის მოცულობა 18.75 მილიონი ლარია, „საქართველოს ბანკის“ წილი კი 6.25 მილიონ ლარს შეადგენს.

ეს არის პირველი შემთხვევა სამხრეთ კავკასიის ქვეყნებსა და საქართველოში, როდესაც საფონდო ბირჟაზე გენდერული ობლიგაციების ჩაშვება განხორციელდა.

Crystal-ის გენდერული ობლიგაციები სოციალურ ხასიათის ატარებს და მის მიზანს გენდერული თანასწორობისა და ქალების გაძლიერების ხელშეწყობა წარმოადგენს. შესაბამისად, ობლიგაციები მიმართულია ქალების მიერ დაფუძნებული მიკრო, მცირე და საშუალო ზომის ბიზნესების დაფინანსებისა და მათი ეკონომიკური გაძლიერებისკენ.

გენდერული ობლიგაციების ბირჟაზე განთავსება ქვეყნისათვის მნიშვნელოვანი ინიციატივაა, რადგან მიკრო, მცირე და საშუალო ზომის ბიზნესები საქართველოს ეკონომიკაში გადამწყვეტ როლს ასრულებენ - ისინი ქვეყანაში ქმნიან სამუშაო ადგილების ნახევარზე მეტს. თუმცა, მათი ზრდა შეფერხებულია ფინანსებზე შეზღუდული ხელმისაწვდომობის გამო. ამ კონტექსტში, განსაკუთრებით მოწყვლად ჯგუფს კი ქალები წარმოადგენე.

მიკროსაფინანსო ორგანიზაციები, თავის მხრივ, მნიშვნელოვან როლს ასრულებენ მოწყვლადი ჯგუფებისთვის ფინანსებზე ხელმისაწვდომობის გაზრდის პროცესში, განსაკუთრებით, დაბალი შემოსავლების მქონე მსესხებლებისთვის, რომლებიც რურარულ გარემოში ცხოვრობენ“,-აღნიშნულია „საქართველოს ბანკის“ მიერ გავრცელებულ ინფორმაციაში.

„მოხარული ვარ გაცნობოთ „კრისტალსა“ და „აზიის განვითარების ბანკს“ (ADB) შორის პირველი პარტნიორობის შესახებ. „კრისტალი“ ყოველთვის იყო მდგრადი დაფინანსების და მცირე მეწარმეების აქტიური მხარდამჭერი, რაც დასტურდება მრავალი კორპორაციული ჯილდოთი და საინვესტიციო გარიგებებით. მოცემული ტრანზაქცია არის ADB-ს და ჩვენი საერთო ღირებულებების ნათელი მაგალითი და ემსახურება საქართველოში მეწარმე ქალებისთვის ფინანსებზე ხელმისაწვდომობის ზრდის მიზანს. ასევე, მადლობას ვუხდით ჩვენს პარტნიორებს - „საქართველოს ბანკს“ და „Galt & Taggart“-ს ტრანზაქციის აქტიური მხარდაჭერისთვის. ვიმედოვნებთ, რომ მსგავსი ნაყოფიერი თანამშრომლობა მომავალშიც გაგრძელდება და საბოლოო ჯამში, ხელს შეუწყობს ქვეყნის ეკონომიკურ განვითარებას“, - აღნიშნა „კრისტალის“ უფროსმა აღმასრულებელმა ოფიცერმა, ილია რევიამ.

“ადგილობრივი სავალუტო ობლიგაციები ემსახურება იმ ფინანსური ხარვეზების შევსებას, რომელიც ხელს უშლის განვითარებად ქვეყნებს, მიაღწიონ მდგრად და ინკლუზიურ განვითარებას. შესაბამისად, ზემოთხსენებული ობლიგაციები ხელს უწყობს კერძო სექტორის მიერ კაპიტალის ეფექტურ მართვას. ამასთანავე, ეს ტრანზაქცია საერთაშორისო სტანდარტების შესაბამისი თემატური ობლიგაციების შესახებ ცნობიერების ამაღლების გზით ხელს შეუწყობს საქართველოში კაპიტალის ბაზრის გაღრმავებას და ქალების მიერ მართული მცირე და საშუალო ბიზნესებისთვის ფინანსებზე ხელმისაწვდომობის ზრდას“, - აღნიშნა ADB-ის კერძო სექტორის საფინანსო ინსტიტუტების განყოფილების დირექტორმა, კრისტინ ენგსტრომმა.

„მოხარული ვარ, რომ „გალტ & თაგარტი“ აქტიურად იყო ჩართული ასეთი უპრეცენდენტო გარიგების წარმატებით განხორციელებაში, განთავსებისა და კალკულაციის აგენტის როლში. ეს ტრანზაქცია „კრისტალისა“ და „გალტ & თაგარტის“ მესამე ერთობლივი განთავსებაა, რაც მეტყველებს როგორც „კრისტალის“ სანდოობაზე, ასევე, ინვესტორების მხრიდან ზოგადად, მსგავს ტრანზაქციებზე ნდობის ზრდაზე. აღსანიშნავია გარიგების უნიკალური მახასიათებელი, რაც გულისხმობს პირველი გენდერული ობლიგაციების განთავსებას საქართველოს ფასიანი ქაღალდების ბაზარზე. ვიმედოვნებთ, მომავალში არა ერთი მსგავსი ტრანზაქცია განხორციელდება, რაც განსაკუთრებით მნიშვნელოვანია ლარის ობლიგაციების ემისიებისთვის. მსურს, მადლობა გადავუხადო და მივულოცო „გალტ & თაგარტის“ მთელ გუნდს მორიგი წარმატებული და საინტერესო გარიგებისთვის. „გალტ & თაგარტი“ საქართველოს ბაზარზე წლებია წამყვანი საინვესტიციო ბანკის როლში ეფექტურად თანამშრომლობს როგორც კერძო და საჯარო სექტორის სხვადასხვა წარმომადგენელთან, ასევე საერთაშორისო საფინანსო ინსტიტუტებთან“, - განაცხადა ოთარ შარიქაძემ, „Galt & Taggart”-ის მმართველმა დირექტორმა.