იტალიის პრემიერ-მინისტრმა ჯორჯია მელონიმ კიდევ ერთხელ დაადასტურა მისი მთავრობის მტკიცე მხარდაჭერა უკრაინისადმი მას შემდეგ, რაც ყოფილმა პრემიერ-მინისტრმა, სილვიო ბერლუსკონიმ უკრაინის პრეზიდენტის ვოლოდიმირ ზელენსკის მიმართ კრიტიკული განცხადებები გააკეთა.

მელონის ოფისმა განცხადება გაავრცელა, რომელშიც აღნიშნულია, რომ იტალიის მთავრობა მტკიცედ და ურყევად უჭერს მხარს უკრაინას.

ინფორმაციისთვის, სილვიო ბერლუსკონიმ, ბრიუსელში გამართულ ევროკავშირის სამიტის ფარგლებში მელონისა და ზელენსკის შეხვედრის კომენტირებისას განაცხადა, თავად რომ პრემიერ - მინისტრი ყოფილიყო, ზელენსკის არ შეხვდებოდა.

მისი მტკიცებით, ზელენსკის რომ დონბასზე „შეტევა შეეწყვიტა“, რუსეთი უკრაინას თავს საერთოდ არ დაესხმებოდა.

"ამიტომ მე ამ ვაჟბატონის საქციელს ძალიან, ძალიან უარყოფითად ვაფასებ", - აღნიშნა ბერლუსკონიმ.

შეგახსენებთ, სილვიო ბერლუსკონი სამჯერ იყო იტალიის პრემიერ-მინისტრი, 1994-2011 წლებში და მისი პარტია Forza Italia ამჟამად იტალიის მმართველი კოალიციის ნაწილია.