შეუძლებელია, როცა მთავარი ამბები პარლამენტში ხდება, აქციაზე იდგე პარტიის რამდენიმე თანამშრომელთან ერთად და რაღაცას ყვიროდე, - ამის შესახებ ჟურნალისტებთან "გირჩის" დეპუტატმა სანდრო რაქვიაშვილმა განაცხადა, რითაც გამოეხმაურა ევროკავშირის ელჩის განცხადებას, რომ ოპოზიციამ პარლამენტში უნდა იმუშაოს.

რაქვიაშვილი მიიჩნევს, რომ ოპოზიციის ასეთი ქმედებები სასაცილოა.

„ევროპელები უკვე წლებია გვეუბნებიან ოპოზიციონერებს და მათ შორის, "ნაციონალური მოძრაობის" წევრებს, რომ დაუშვებელია ასეთი ქცევა, როცა რაღაც შეიძლება არ მოგეწონოს და ნაწყენი ბავშვივით გაიქცე, ან თუ უმრავლესობა არ გაქვს, არ იმუშაო. ეს ევროპელებს არც კი ესმოდათ არასდროს. თუმცა, "ნაციონალური მოძრაობის" წევრები არც წარსულში უსმენდნენ მათ და არც ახლა უსმენენ. იმედია, ადრე თუ გვიან მიხვდებიან, რადგან შეუძლებელია როცა მთავარი ამბები პარლამენტში ხდება, აქციაზე იდგე პარტიის რამდენიმე თანამშრომელთან ერთად და რაღაცას ყვიროდე, იმდენად სასაცილოდ გამოჩნდება ეს უკვე, ალბათ, მიხვდებიან, რომ ეს უნდა დაასრულონ“, - განაცხადა რაქვიაშვილმა.

ცნობისათვის, ევროკავშირის ელჩი პაველ ჰერჩინსკი ოპოზიციას მოუწოდებს დარჩეს პარლამენტში და კონსტრუქციულად მიუდგეს 12 რეკომენდაციის შესრულების პროცესს. როგორც მან "ინტერპრესნიუსთან" განაცხადა, მშვიდობიანი პროტესტი ნებისმიერი დემოკრატიული სისტემის ნაწილია, თუმცა, პოლიტიკური დისკუსია პარლამენტში უნდა მიმდინარეობდეს.