წარმატებით დავასრულეთ მოლაპარაკება პარტნიორ ყაზახურ ავიაკომპანიასთან „ფლაიაინსტანი“. შედეგად, ქუთაისის საერთაშორისო აეროპორტში პირდაპირი რეგულარული საჰაერო მიმოსვლა ქუთაისსა და ალმათის შორის დაიწყება. ამგვარად, ფრენების სიხშირეთა რაოდენობა კვირაში 15-მდე გაიზრდება. ამ ეტაპზე, საქართველოში ფრენები ყაზახეთის 4 ქალაქიდან ხორციელდება , - ამის შესახებ ეკონომიკისა და მდგრადი განვითარების მინისტრის მოადგილემ, მარიამ ქვრივიშვილმა განაცხადა.

მისი თქმით, ალმათი მნიშვნელოვანი დანამატია ქუთაისის საერთაშორისო აეროპორტისთვის, საქართველოს ავიაბაზრისა და ტურიზმის სექტორისთვის.

„დამატებითი სიხშირეები და მიმართულებები ხელს უწყობს ტურისტული ნაკადების ზრდას. განსაკუთრებით გამოვყოფდი ყაზახეთს, როგორც ჩვენთვის ერთ-ერთ პრიორიტეტულ მიმართულებას“, - განაცხადა მინისტრის მოადგილემ.

ცნობისთვის, „ფლაიარისტანი“ კვირაში ორი სიხშირით ფრენებს ალმათი - ქუთაისის მიმართულებით 4 ივნისიდან შეასრულებს.