სტატისტიკის ეროვნულმა სამსახურმა ახალი ინტერაქციული პროექტის ,,რეგიონული და მუნიციპალური პორტალი“ პრეზენტაცია გამართა, რომელსაც მთავრობის, დონორი ორგანიზაციების, ადგილობრივი მმართველობისა და თვითმმართველობის, ასევე, არასამთავრობო ორგანიზაციების წარმომადგენლები ესწრებოდნენ. ამის შესახებ ინფორმაციას საქართველოს სტატისტიკის ეროვნული სამსახური ავრცელებს.
მათი ცნობით, პორტალი ევროკავშირის, დანიისა და გაეროს განვითარების პროგრამის (UNDP) მიერ მხარდაჭერილი პროექტის ფარგლებში მომზადდა და მისი მიზანია მუნიციპალურ დონეზე სტატისტიკური შესაძლებლობების განვითარება, სტატისტიკის წარმოების გაუმჯობესება და ინფორმაციის ხელმისაწვდომობის გაზრდა, რაც თავის მხრივ ხელს შეუწყობს ადგილობრივ დონეზე განვითარების ღონისძიებების დაგეგმვასა და მონიტორინგს.
როგორც ინფორმაციაშია აღნიშნული, საქსტატის აღმასრულებელი დირექტორის გოგიტა თოდრაძის თქმით, - რეგიონული და მუნიციპალური პორტალი ყველა კატეგორიის მომხმარებლისთვის ხელმისაწვდომი იქნება და საშუალებას მისცემს კიდევ უფრო მარტივად და სწრაფად მოიძიონ მათთვის სასურველი სტატისტიკური ინფორმაცია, როგორც რეგიონის ასევე მუნიციპალიტეტის დონეზე.
„პორტალი შესაძლებლობას გვაძლევს შევადაროთ ძირითადი მაჩვენებლები როგორც რეგიონების, ასევე მუნიციპალიტეტების დონეზე. პორტალზე არსებული 80-მდე მაჩვენებელი ისეთ სფეროებს მოიცავს, როგორიცაა მოსახლეობა და დემოგრაფია, ჯანდაცვა და სოციალური უზრუნველყოფა, განათლება, კულტურა, მშენებლობა, ტურიზმი, ბიზნეს რეგისტრი, ბიზნეს სექტორი და სხვა.
„ევროკავშირი მხარს უჭერს სანდო და მრავალფეროვანი მუნიციპალური მონაცემების შეგროვებას საქართველოში. საქსტატის ახალი სერვისი ეხმარება პოლიტიკის შემქმნელებსა და ადგილობრივ ხელისუფლებას, გამოავლინონ არსებული ეკონომიკური, სოციალური თუ გარემოსდაცვითი საკითხები, რომლებიც ყურადღებას საჭიროებს“, - განაცხადა კოლომბ დე მერსიმ, საქართველოში ევროკავშირის წარმომადგენლობის მმართველობისა და ადამიანური კაპიტალის მიმართულების ხელმძღვანელმა.
„მუნიციპალიტეტებს სჭირდებათ სანდო და გამჭვირვალე სტატისტიკური ინფორმაცია, რათა თავისი საჭიროებები სწორად შეაფასონ და შესაბამისი პროგრამები დაგეგმონ. დეცენტრალიზაციისა და კარგი მმართველობის მხარდაჭერის ფარგლებში, დანია ხელს უწყობს მუნიციპალური სტატისტიკის შეგროვების გაუმჯობესებას საქართველოში“, - აღნიშნა ენ ტოფტ სორენსენმა, დანიის ელჩმა საქართველოში.
„UNDP მიესალმება ევროკავშირსა და დანიასთან თანამშრომლობას, რომლის ფარგლებში ჩვენ ვეხმარებით საქსტატს მისი სასიცოცხლოდ მნიშვნელოვანი საქმიანობის განხორციელებაში. საქსტატის საქმიანობა პასუხობს საქართველოს ეროვნულ საჭიროებებს სტატისტიკური მონაცემების მხრივ და ხელს უწყობს ქვეყნის მდგრადი განვითარების მიზნების მიღწევას“, - აღნიშნა ნიკ ბერესფორდმა, გაეროს განვითარების პროგრამის მუდმივმა წარმომადგენელმა საქართველოში.
მუნიციპალიტეტების დონეზე სტატისტიკური მონაცემების წარმოების შესაძლებლობების ზრდა საქართველოს ოფიციალური სტატისტიკის ეროვნული სისტემის განვითარების 2020-2023 წლებისა და დეცენტრალიზაციის 2020-2025 წლების სტრატეგიებით განსაზღვრული ერთ-ერთი პრიორიტეტია. ზემოაღნიშნული სტრატეგიების ფარგლებში, საქართველოს რეგიონული განვითარებისა და ინფრასტრუქტურის სამინისტრო, საქართველოს სტატისტიკის ეროვნული სამსახური და გაეროს განვითარების პროგრამა (UNDP), ევროკავშირისა და დანიის მთავრობის დაფინანსებით, თანამშრომლობენ ადგილობრივ დონეზე საჭიროებებზე დაფუძნებული სტატისტიკის წარმოების გაუმჯობესებისათვის“, - ნათქვამია გავრცელებულ ინფორმაციაში.