ნატოს მოკავშირე ქვეყნები უკრაინას უპრეცედენტო დახმარებას აწვდიან, - ამის შესახებ ნატოს გენერალურმა მდივანმა იენს სტოლტენბერგმა ბრიუსელში ალიანსის თავდაცვის მინისტრების სხდომის გახსნისას განაცხადა.

მან აღნიშნა, რომ ნატოს მოკავშირე ქვეყნები, ევროკავშირთან მჭიდრო თანამშრომლობაში, უკრაინის მხარდაჭერას იმდენ ხანს გააგრძელებენ, “რამდენიც საჭირო იქნება”, რათა კიევმა შეძლოს “თავდაცვის უფლების გამტკიცება”.

“დღეს ჩვენ უწყვეტ დახმარებას განვიხილავთ, რომელიც აუცილებელია უკრაინის, როგორც დამოუკიდებელი სუვერენული სახელმწიფოს გასამარჯვებლად და წესებზე დაფუძნებული საერთაშორისო წესრიგის დასამტკიცებლად”, - თქვა სტოლტენბერგმა.

სტოლტენბერგის თქმით, პუტინმა სათანადოდ არ შეაფასა უკრაინელების სიძლიერე და სიმამაცე, ისევე როგორც ნატოს და მისი პარტნიორების გაბედულობა და ერთიანობა.

შეხვედრას ასევე ესწრებიან აშშ-ის თავდაცვის მდივანი ლოიდ ოსტინი და უკრაინის თავდაცვის მინისტრი ოლექსი რეზნიკოვი.