ევროპარლამენტის პრეზიდენტი, რობერტა მეცოლა მოლდოვის პრეზიდენტს, მაია სანდუს წერილს უგზავნის, რომელშიც ის, ევროპარლამენტის სახელით, მოლდოვის მიმართ ურყევ სოლიდარობას გამოხატავს.

„მსურს, ევროპარლამენტის სახელით, გამოვხატო ჩვენი ურყევი სოლიდარობა მოლდოვას რესპუბლიკის მიმართ და ჩვენი ნდობა მოლდოვის პროევროპული ხელმძღვანელობის მიმართ“, - აღნიშნულია წერილში, რომელიც მეცოლას „ტვიტერის“ ოფიციალურ გვერდზე გამოქვეყნდა.

„ჩვენ კარგად ვიცით რთული საშინაო ვითარება და გეოპოლიტიკური კონტექსტი, რომლის წინაშეც თქვენი ქვეყანა დგას და რომელიც გამწვავებულია უკრაინის წინააღმდეგ რუსეთის აგრესიული ომის შედეგად“, - წერს მეცოლა.

მისი თქმით, მოლდოვის ადგილი ევროკავშირშია. „ნება მიბოძეთ, შევაქო თქვენი ხელმძღვანელობა და გამბედაობა მოლდოვაში მნიშვნელოვანი რეფორმების გატარებაში. მოლდოვას ადგილი ჩვენთან, ევროპულ ოჯახშია“, - წერს ევროპარლამენტის პრეზიდენტი.

შეგახსენებთ, მოლდოვის პრეზიდენტმა, მაია სანდუმ განაცხადა, რომ რუსეთი მოლდოვაში დივერსანტების გამოყენებით სიტუაციის დესტაბილიზაციას გეგმავდა.