რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანია მცხეთის მუნიციპალიტეტის სოფლების - წეროვანისა და გოროვანის ძირითადი დასახლებების წყალმომარაგებისთვის სისტემის მოწყობის პროექტირება-მშენებლობას იწყებს.

როგორც „ინტერპრესნიუსს“ გაერთიანებული წყალმომარაგების კომპანიიდან აცნობეს, შესაბამის ხელშეკრულებას ხელი წყალმომარაგების კომპანიის დირექტორის მოადგილემ, ნინო ნაროზაშვილმა და ტენდერში გამარჯვებული კონტრაქტორი კომპანიის - შპს „ალგეთის“ წარმომადგენელმა შალვა შალვაშვილმა მოაწერეს.

„სამუშაოების ფარგლებში გათვალისწინებულია სათავე ნაგებობების, სატუმბი სადგურის, მაგისტრალებისა და წყალმომარაგების ქსელების მოწყობა, გარდა ამისა რეაბილიტირდება არსებული რეზერვუარები.

პროექტს, სახელმწიფო ბიუჯეტის დაფინანსებით ჯამურად 8 მლნ ლარზე მეტი მოხმარდება.

სამუშაოები ეტაპობრივად, 2025 წლის გაზაფხულის სეზონზე დასრულდება, რის შემდეგაც ადგილობრივები 24 საათიანი, ხარისხიანი წყალმომარაგებით ისარგებლებენ.

კომპანიამ 2022 წლის ბოლოს სოფელ წეროვანის გარკვეული ნაწილისთვის წყალმომარაგებისთვის საჭირო სამუშაოები დაასრულა, რომლის ფარგლებშიც მოეწყო წყალმომარაგების ქსელი და სატუმბი სადგური“, - ნათქვამია გავრცელებულ ინფორმაციაში.