ამ „დემოკრატიის მამებს“ რომ ევროპა უნდა გააკვირვონ დემოკრატიით, რა ცხოველი ინტერესი აქვთ ადამიანის მოკვდინების, მართლა ვერ ვხვდები - მე მიმყარდება ეჭვი, რომ მარტო სააკაშვილის ჩამოშორების ამბავი არ არის, რაღაც ვალდებულება აქვს ვიღაცას პუტინთან და ვერ რისკავს სააკაშვილის გაშვებას, - ამის შესახებ „სტრატეგია აღმაშენებლის“ ერთ-ერთმა ლიდერმა პაატა მანჯგალაძემ „პალიტრანიუსის“ გადაცემა „ნიუსრუმში“ განაცხადა.

მისი თქმით, არ დარჩა ინსტიტუცია მსოფლიოში, რომელიც ყოფილი პრეზიდენტის, მიხეილ სააკაშვილის საკითხს არ შეეხო და ხელისუფლებას დელიკატურად არ მოუწოდა, რომ გამოიჩინონ ჰუმანურობა და ადამიანობა.

„ამ „დემოკრატიის მამებს“ რომ ევროპა უნდა გააკვირვონ დემოკრატიით, რა ცხოველი ინტერესი აქვთ ადამიანის მოკვდინების, მართლა ვერ ვხვდები. ამერიკის სახელმწიფო დეპარტამენტი ამას ამბობს, ევროკავშირის უმაღლესი რანგის მოხელეები ამას ლაპარაკობენ, ევროპარლამენტის რეზოლუცია, ევროპული საბჭო - მართლა რა გჭირთ ხალხო! სვავები ხომ არ არიან? ასეთი რა ვალდებულება აქვთ პუტინთან ან რა ცხოველი ინტერესი აქვთ ადამიანის მოკვდინების, მე მართლა ვერ ვხვდები. არანორმალურია ეს ყველაფერი. თუ ბიძინას ფინანსებია მთავარი და არ გინდათ სააკაშვილის მოკვლა, ეს საკითხი მოგვარებადია. თუ არ მოკლავ სააკაშვილს და თუ კანდიდატის სტატუსს მიაღებინებენ ქვეყანას, რეზოლუციაც რომ გამოიყენა „კრედიტ სუისმა“, ამის გამოყენების არგუმენტიც არ ექნება მინიმუმ. მე მიმყარდება ეჭვი, რომ მარტო სააკაშვილის ჩამოშორების ამბავი არ არის, რაღაც ვალდებულება აქვს ვიღაცას პუტინთან და ვერ რისკავს სააკაშვილის გაშვებას. მართლა პუტინთან თუ არ არიან გარიგებულები და თუ პუტინის არ ეშინიათ, რატომ არ უშვებენ ადამიანს, მართლა სვავები არიან, რომ ადამიანის მოკვლა უნდათ და ეგ არის ამოცანა?!

იციან, რომ როცა პუტინს გადააგდებ, ეს მთავრდება პოლონიუმის მიღებით და აი, ამის ეშინიათ ამ პატარა კაცებს და ამის გამო ანგრევენ ქვეყანას. ერთხელ ხომ თქვა ვოლსკიმ, რომ „კალაშნიკოვი“ გვაქვს შუბლზე მიბჯენილიო, გვითხრან, ვინ მიაბჯინა ეს „კალაშნიკოვი“ და იქნებ გვერდში დავუდგეთ და დავეხმაროთ“, - განაცხადა მანჯგალაძემ.