გონების კარგვაზე მე არაფერი გამიგია, მაგრამ ძალიან ცუდად რომ არის და ნებისმიერ მომენტში რომ შეიძლება უბრალოდ გაქრეს, ამას ვხედავ, - ამის შესახებ საქართველოს ყოფილი პრეზიდენტის მიხეილ სააკაშვილის დედამ გიული ალასანიამ ჟურნალისტებს „ვივამედში“ განუცხადა.

კითხვაზე, რა ჩივილები აქვს ახლა მიხეილ სააკაშვილს ჯანმრთელობის მდგომარეობასთან დაკავშირებით, ალასანია ამბობს, რომ „ამას ჩივილიც აღარ ჰქვია და ადამიანი მომაკვდავია“.

რაც შეეხება იმას, ხომ არ აპირებს სააკაშვილი 7 ნოემბრის საქმესთან დაკავშირებით დღეს საკუთარ პროცესზე დისტანციურად ჩართვას, ალასანია აცხადებს, რომ „ვერ დააპირებს, იმდენად ცუდადაა“.

მისივე ინფორმაციით, სააკაშვილთან სახალხო დამცველის კონსილიუმის წევრები აპირებენ შესვლას, თუმცა არ იცის როდის.

გარდა ამისა, გიული ალასანია გამოეხმაურა მიხეილ სააკაშვილისთვის სასჯელის გადავადების ან სასჯელისგან გათავისუფლების საკითხზე მოსამართლე გიორგი არევაძის დასაბუთებას. მისი შეფასებით, ეს დასაბუთება ძალიან სუსტია.

„ძალიან ცუდადაა დასაბუთებული, სუსტად, არა უბრალოდ მავნებლურად, არამედ, მესამე კლასელის დაწერილს ჰგავს. მიჩნდება ეჭვი, რომ ამ ადამიანის დაწერილიც არაა და პირდაპირ დაწერილი დაუდეს“,- განაცხადა გიული ალასანიამ.