შეიძლება ითქვას, რომ მიხეილ სააკაშვილი საუკეთესო პირობებშია, აქვს ერთადერთი მოთხოვნა წაყენებული - ნუ მიირთმევ მარტო შავ პურს და ნიორს, - ამის შესახებ ჟურნალისტებთან საპარლამენტო უმრავლესობის წევრმა ირაკლი ქადაგიშვილმა განაცხადა.

ქადაგიშვილი ევროპარლამენტში მიხეილ სააკაშვილთან დაკავშირებული რეზოლუციის კენჭისყრას გამოეხმაურა, რომელიც დღეს იგეგმება და აღნიშნა, რომ ყველასგან მოითხოვენ ერთ რამეს, "განცხადება იქნება თუ რეზოლუცია, ობიექტური სიმართლე იყოს ასახული".

"საქართველოს სახელმწიფომ მიხეილ სააკაშვილთან მიმართებით არც ერთხელ არ იმოქმედა ისე, რომ მისი რაიმე უფლება დაზიანებულიყო, არც მოუწამლავს და არც უწამებიათ, როგორც ამტკიცებდნენ და ყველა პირობა აქვს ადეკვატური მკურნალობის ჩატარების. სხვა ინსინუაციები, რომ თითქოსდა ეს ყველაფერი მოხდა, არის საქართველოს სახელმწიფოს მტრობა. ასეთ ლობისტური წესით მიღებულ განცხადებებზე გვექნება შესაბამისი რეაქცია. ადამიანი არის სამედიცინო დაწესებულებაში, ნორმალურ, შეიძლება ითქვას, საუკეთესო პირობებში, აქვს ერთადერთი მოთხოვნა წაყენებული, ნუ მიირთმევ მარტო შავ პურს და ნიორს.

ევროპარლამენტში რომ თურმე ბევრი იყიდება, ეგ თვითონ ევროპარლამენტიდან გავიგეთ, ეგ ზოგადად, რომ იცოდეთ, მგონი უკვე 7 ადამიანია დაპატიმრებული თუ დასანქცირებული იმისთვის, რომ იყიდებიან - ეს ერთი, მეორე - ის, რომ პოლიტიკურ ლობიზმთან გვაქვს საქმე, ეს ნათელია. მილიონებს იხდიან ტყუილი ინფორმაციის გავრცელებაზე და ათი ათასი დოლარი ვერ გაიმეტეს იმისთვის, რომ ნორმალური ექიმი, როგორც ისინი თვლიან, ჩამოეყვანათ და კვების რეჟიმი დაენიშნათ,"- განაცხადა ქადაგიშვილმა.