თავისუფალი პრესა შეზღუდულია - ცუდია, რომ ევროპული ფასეულობა, მათ შორის, მედიის და ინფორმაციის გავრცელების თავისუფლება, ასეთი წნეხის ქვეშაა, - ამის შესახებ ჟურნალისტებთან საპარლამენტო უმრავლესობის წევრმა ირაკლი ქადაგიშვილმა განაცხადა, რითაც გამოეხმაურა იურიდიული ფირმა „ემ ქეი დის“ ინფორმაციას, რომ „კრედიტ სუისს“-ის მენეჯმენტის ქმედებათა აღმწერი მორიგი მწვავე სტატიის საერთაშორისო მედიაში გამოქვეყნებაზე განმეორებით უარი უთხრეს.

ქადაგიშვილი აცხადებს, რომ ამის უკან პოლიტიკური ინტერესი დგას.

„ვხედავთ, რომ მსოფლიოში ერთ- ერთი ყველაზე წამყვანი ბანკი ყოველგვარი სამართლებრივი საფუძვლის და არგუმენტის გარეშე ფაქტობრივ სანქციას ახორციელებს კანონიერი თანხების მფლობელ ადამიანზე, ამის უკან რა თქმა უნდა, გარდა პოლიტიკური ინტერესისა, სხვა ინტერესი ვერ იქნება დანახული, რადგან ვერც ერთი სამართლებრივი არგუმენტი ბანკმა ვერც ერთ სასამართლო პროცესზე ვერ მოიყვანა. ამ პოლიტიკური ინტერესის უკან დგას ის, რომ თავისუფალი პრესა შეზღუდულია, რომ ბანკის მენეჯმენტი, რომელიც არაკანონიერ ქმედებას ახორციელებს, ეს ქმედება საჯარო გახადოს. ცუდია, რომ ევროპული ფასეულობა მათ შორის, მედიის და ინფორმაციის გავრცელების თავისუფლება ასეთი წნეხის ქვეშაა", - განაცხადა ქადაგიშვილმა.