პარტია „ნაციონალური მოძრაობა” მოითხოვს, რომ ყველა ის დეტალი გასაჯაროვდეს, რამაც საქართველოს მოქალაქეები 76 მილიონი დოლარით - თითქმის 200 მილიონი ლარით გააღარიბა, - ამის შესახებ პარტია „ნაციონალური მოძრაობის“ წევრმა, გიორგი კაპანაძემ განაცხადა, რითაც ის Inter Rao-სთან ორი საარბიტრაჟო დავის წაგებას გამოეხმაურა.

მისი თქმით, „ნაციონალური მოძრაობა“ მოითხოვს, რომ მაშინდელი ენერგეტიკის მინისტრის, კახა კალაძის პასუხისმგებლობის საკითხი დადგეს.

„ხელისუფლების არაკომპეტენტური და არაკვალიფიციური მოქმედებების გამო, საერთაშორისო არბიტრაჟის გადაწყვეტილებით, საქართველოს ბიუჯეტს 76 მილიონი დოლარის გადახდა დაეკისრა, რაც თითქმის 200 მილიონი ლარია.

ძვირფასო მოქალაქეებო, „ქართული ოცნების“ მაშინდელმა ენერგეტიკის სამინისტრომ, ელექტროენერგიის ტარიფები 2-ჯერ გაზარდა, შემდეგ კი, თითქოს რამდენიმე პროცენტით შეამცირა, რის გამოც ცალმხრივად მოშალა ხელშეკრულება და რამაც წარმოშვა საერთაშორისო დავა.

საბოლოოდ, ხელისუფლების მავნებლური პოლიტიკის გამო, რომლის ჩრდილოვანი მმართველი ტარიფების განახევრებას გვპირდებოდა, ელექტროენერგიაც გაგვიძვირა და დამატებით 200 მილიონი ლარის გადახდაც დაგვეკისრა.

ეს არის მძიმე ტვირთი ჩვენი მოქალაქეებისათვის და ეს ნიშნავს თითოეული თქვენგანის კიდევ უფრო მეტად გაღარიბებას. მსხვილი კორუფციული სქემებითა და “ქართული ოცნების” დანაშაულებრივი გადაწყვეტილების გამო, საფრთხე ექმნება ჩვენს ენერგო დამოუკიდებლობას. ამიტომ, „ნაციონალური მოძრაობა“ მოითხოვს, რომ დადგეს მაშინდელი ენერგეტიკის მინისტრის, კახა კალაძის პასუხისმგებლობის საკითხი.

„ნაციონალური მოძრაობა” მოითხოვს, რომ ყველა ის დეტალი გასაჯაროვდეს, რამაც საქართველოს მოქალაქეები 76 მილიონი დოლარით - თითქმის 200 მილიონი ლარით გააღარიბა. მაგალითად, ამ თანხით შესაძლებელი იქნებოდა, კახეთის ავტობანი გაგვეკეთებინა ისე, რომ ვალი არ აგვეღო“, - განაცხადა კაპანაძემ.

ცნობისთვის, საქართველომ Inter Rao-სთან ორი საარბიტრაჟო დავა წააგო. როგორც Bpn.ge წერს, ერთი მხრივ, საუბარია, 76 მილიონ დოლარიან საარბიტრაჟო დავაზე, რომელიც 2017 წლიდან მსოფლიო ბანკთან არსებულ საერთაშორისო საინვესტიციო დავების მოგვარების ცენტრში (ICSID) მიმდინარეობდა, მეორე დავა კი, საქართველომ სტოკჰოლმის საარბიტრაჟო ტრიბუნალში წააგო. საუბარია პარალელურ საინვესტიციო დავაზე Inter Rao-სთან, რომლის ფარგლებშიც ქვეყანას 112 მილიონი დოლარის გადახდა დაეკისრა. არსებული განმარტებით, საქართველოს არა ორივეს, არამედ, ერთ-ერთი დავის თანხის გადახდა მოუწევს, რადგან შეკრებითობა არბიტრაჟის შემთხვევაში არ ხდება.