პარტია „ევროპელი დემოკრატების“ გენერალური მდივნის, მამუკა გამყრელიძის განცხადებით, ევროკავშირის კანდიდატი ქვეყნის სტატუსის მიღება საქართველოსთვის ეგზისტენციალური მნიშვნელობის საკითხია, სტატუსის არმიღების შემთხვევაში, ეს შესაძლებლობა გადავადდება გაურკვეველი დროით, გამოიწვევს რუსეთის ინტერესების გამყარებას საქართველოში და ქვეყნის გადასროლას რუსეთის გავლენის ორბიტაზე.

მისი განმარტებით, სასიცოცხლო საფრთხეების პირისპირ მდგარ ქვეყანაში ძირითადი პრობლემებიდან აქცენტის დაყვანა მიხეილ სააკაშვილთან დაკავშირებულ საკითხამდე, დაუშვებელია.

„ქვეყანაში არსებული მძიმე პრობლემები და ევროკავშირის წევრი ქვეყნის სტატუსთან დაკავშირებული 12 რეკომენდაციის შეუსრულებლობა, რეალურად აფერხებს ევროკავშირის სტატუსის მიღების საკითხს.

ამ ფონზე ევროკავშირის მხრიდან ისეთი განცხადებების გაკეთება, რომელშიც ყურადღება ძირითადი საკითხიდან, 12 პუნქტის არშესრულებიდან, გადატანილია სხვა თემებზე, ხელს აძლევს „ქართულ ოცნებას“ დაიყვანოს მათ მიერ რეფორმების შეუსრულებლობის პრობლემა მხოლოდ მიხეილ სააკაშვილის საკითხამდე.

ჰუმანური მოპყრობა ყოფილი პრეზიდენტის და ნებისმიერი პატიმრის მიმართ, რა თქმა უნდა, მნიშვნელოვანი და აუცილებელია, მაგრამ გაცილებით პრიორიტეტული და ქვეყნისთვის პირველხარისხოვანია ევროკომისიის 12 რეკომენდაციის შესრულება, რაზეც დამოკიდებულია ჩვენი ქვეყნისთვის სტატუსის მინიჭება.

მხოლოდ მიხეილ სააკაშვილის ჯანმრთელობის მდგომარეობა და მისი საკითხის გადაჭრა მნიშვნელოვანია „ნაციონალური მოძრაობისთვის“, ევროკავშირის სტატუსის მიღება და ევროკომისიის 12 რეკომენდაციის შესრულება კი წარმოადგენს საქართველოს მოსახლეობის 80 % -ის ინტერესს და არის ნომერ პირველი მნიშვნელობის საკითხი ქვეყნისთვის, შესაბამისად, ევროკომისიის 12 პუნქტიდან აქცენტის გადატანა სხვა თემებზე, თუნდაც მნიშვნელოვანზე, რასაც კარგად იყენებს „ქართული ოცნება, “ აზიანებს სტატუსის მისაღებად აუცილებელი რეკომენდაციების შესრულების პროცესს“, - აცხადებს მამუკა გამყრელიძე.

აღნიშნულ კომენტარს პარტია „ევროპელი დემოკრატები“ ავრცელებს.