სახეზეა სრული არაკომპეტენტურობა კულტურის კომიტეტის მართვასა და საკუთარი ინსტიტუციური პასუხისმგებლობის გაცნობიერებაში, - ამის შესახებ "ლელოს" ერთ-ერთმა ლიდერმა დეა მეტრეველმა გელათთან დაკავშირებით განაცხადა.

მისი თქმით, ადგილობრივი და საერთაშორისო ექსპერტები გელათის გადასარჩენად უნდა გაერთიანდნენ.

„დაღუპულია გელათი... არასწორად არის დაგებული [სახურავი]“ - განაცხადა დღეს კომიტეტის სხდომაზე პარლამენტის კულტურის კომიტეტის თავმჯდომარის მოადგილემ ქეთევან დუმბაძემ და სრულად ვიზიარებ მის ამ შეფასებას. მაგრამ აქვე ვსვამთ კითხვას, რატომ მივიყვანეთ საქმე აქამდე? რატომ არ შეასრულა ამ წლების განმავლობაში პარლამენტმა ეფექტური საზედამხედველო ფუნქცია?

დღეს კულტურის კომიტეტი გაიხსნა უაღრესად უცნაური დღის წესრიგით. ელისო ბოლქვაძეს მხოლოდ ერთი საკითხი ჰქონდა მომზადებული განსახილველად და ეს საკითხი არანაირად არ ეხებოდა გელათს. რომ არა კომიტეტის რამდენიმე წევრის დამატებითი კითხვა, სხდომას დახურულად გამოაცხადებდა. აი, სწორედ ასეთი დამოკიდებულებით მიმდინარეობდა ბოლო სამი წლის განმავლობაში კომიტეტის მუშაობა გელათთან მიმართებაში. მხოლოდ ახლა აპირებს ქალბატონი ელისო „არაფორმალური შეხვედრის“ ორგანიზებას „სამშვიდობო კვლევების“ ფარგლებში სამინისტროსთან. არც ერთი სიტყვა მეცნიერების მოწვევაზე, მათი ანგარიშების მოსმენაზე. თავის მართლება არ უნდა უწევდეს კომიტეტის თავმჯდომარეს, რომ სჭირდება საქმეში გარკვევა, რადგანაც ხელთ არა აქვს დოკუმენტები. ქალბატონო ელისო, ყველა დასკვნა დიდი ხანია საჯაროა და თუ საქმეში ჩასაღრმავებლად დამატებითი მასალები გჭირდებოდათ, გამოგეთხოვათ. პარლამენტს, თქვენს კომიტეტს ხომ აქვს ამის ბერკეტები? სიმართლე კი ისაა, რომ სახეზეა სრული არაკომპეტენტურობა კულტურის კომიტეტის მართვასა და საკუთარი ინსტიტუციური პასუხისმგებლობის გაცნობიერებაში.

აღარ არის არაფორმალური შეხვედრების დრო. ადგილობრივი და საერთაშორისო ექსპერტები უნდა გაერთიანდნენ ძეგლის გადასარჩენად“, - განაცხადა მეტრეველმა.