ნატო-ს გენერალური მდივნის, იენს სტოლტენბერგის განცხადებით, რუსეთის პრეზიდენტმა ვლადიმერ პუტინმა უნდა გაიგოს, რომ უკრაინაში ომს ვერ მოიგებს.

აღნიშნული განცხადება ჩრდილოატლანტიკური ალიანსის ხელმძღვანელმა ბრიუსელში, პოლონეთი პრეზიდენტთან, ანჯეი დუდასთან გამართულ ერთობლივ პრესკონფერენციაზე გააკეთა.

"[უკრაინაში] მისი სასტიკი შეჭრიდან თითქმის ერთი წლის შემდეგ, პრეზიდენტი პუტინი არ მიანიშნებს, რომ ის მშვიდობისთვის ემზადება. პირიქით, ის ახალ შეტევებს იწყებს და მიზანში იღებს მშვიდობიან მოსახლეობას, ქალაქებსა და კრიტიკულ ინფრასტრუქტურას", - განაცხადა სტოლტენბერგმა.

ნატო-ს გენმდივნის თქმით, პუტინმა უნდა გაიგოს, რომ მას არ შეუძლია გაიმარჯვოს და ამისათვის ჩრდილოატლანტიკურმა ალიანსმა უნდა გააგრძელოს უკრაინისთვის იარაღისა და საბრძოლო მასალის სწრაფად მიწოდება, რომელიც ოფიციალურ კიევს ტერიტორიის დასაბრუნებლად და საკუთარი სუვერენიტეტის შესანარჩუნებლად სჭირდება.

სტოლტენბერგის განცხადებითვე, „თაობაში უდიდეს უსაფრთხოების კრიზისის“ ფონზე, ნატო შემდგომ ნაბიჯებს დგამს თავდაცვის გასაძლიერებლად.

„ჩვენ ვაძლიერებთ ჩვენს ყოფნას და მზადყოფნას შავი ზღვიდან ბალტიის ზღვამდე, მათ შორის პოლონეთში“, - დასძინა სტოლტენბერგმა.