ახალ ზელანდიაში ციკლონ „გაბრიელეს“ მინიმუმ 5 ადამიანის სიცოცხლე ემსხვერპლა.
ახალი ზელანდიის პრემიერ-მინისტრის, კრის ჰიპკინსის განცხადებით, ზარალის დონე "ძალიან ტრავმულია" და მოსახლეობა უზარმაზარი ზეწოლის ქვეშ იმყოფება.
დღეს დილით, ჰოკს-ბეის რეგიონის მოსახლეობისთვის ევაკუაციის ბრძანება გაიცა. კერძოდ, მათ ვინც დრუმპილის გზის გარშემო იმყოფებიან, მოუწოდეს, რომ დაუყოვნებლივ დატოვონ ტერიტორია.
ჰოკს-ბეის რეგიონის დიდი ნაწილი ელექტროენერგიის გარეშე დარჩა. ათასობით ადამიანი კი იძულებული გახდა, საკუთარი საცხოვრებელი ადგილი დაეტოვებინა.
სახლები ნაწილობრივ ჩაფლულია შლამსა და ტალახში, დაზიანებულია გზები, ხიდები, მოგლეჯილია ხეები.
სამართალდამცავების განცხადებით, 1 400-ზე მეტ ადამიანთან, რომლებიც დაკარგულთა სიაში იმყოფებიან, ჯერჯერობით კონტაქტის დამყარება ვერ ხერხდება.
მედიის ინფორმაციით, ახალმა ზელანდიამ კატასტროფაზე რეაგირებაში დახმაების აღმოჩენის თხოვნით ავსტრალიას მიმართა.