გიორგი რუხაძე - სააკაშვილის მდგომარეობა და ის, როგორ ექცევა სახელმწიფო მას, ანგრევს 12 პუნქტის საქმეს - რაც დრო გადის, უფრო მკაცრი ხდება რეზოლუცია და მცირდება ქვეყნის შანსი, წარმატებას მიაღწიოს ევროინტეგრაციის მიმართულებით
მიხეილ სააკაშვილის დღევანდელი მდგომარეობა და ის თუ, როგორ ექცევა ქართული სახელმწიფო მას, მთლიანად ანგრევს 12 პუნქტის საქმეს - რაც დრო გადის, მით უფრო მკაცრი ხდება რეზოლუცია და მით უფრო მცირდება საქართველოს შანსები, რომ რაიმე წარმატებას მიაღწიოს ევროინტეგრაციის მიმართულებით, - ამის შესახებ ანალიტიკოსმა გიორგი რუხაძემ „პალიტრანიუსის“ გადაცემა „ნიუსრუმში განაცხადა, რითაც ევროპარლამენტში მიღებულ რეზოლუციას გამოეხმაურა, რომელიც მიხეილ სააკაშვილის საზღვარგარეთ სამკურნალოდ გადაყვანას და ივანიშვილის სანქცირებას ითხოვს.
მისი თქმით, რეზოლუციაში ყოფილი პრეზიდენტის მიხეილ სააკაშვილის მდგომარეობასა და საქართველოს ევროკავშირის კანდიდატის სტატუსს შორის ტოლობის ნიშანი პირველად არის დასმული.
„ეს არის უმკაცრესი რეზოლუცია, რაც მე მახსოვს საქართველოსთან მიმართებაში და რა თქმა უნდა, ეს არის იმის ადეკვატური, როგორც პასუხობდა მთელი თვეების განმავლობაში საქართველოს ხელისუფლება ევროპელი პოლიტიკოსების ჯერ შემოთავაზებებს, შემდეგ მოწოდებებს და შემდეგ სერიოზულ კრიტიკას. ჩვენი ხელისუფლების მხრიდან ევროპოლიტიკოსების და ევროპარლამენტის მიმართ განცხადებებში იყო უპატივცემულობა, რეზოლუციების დაკნინების მცდელობა და შესაბამისად, რაც დრო გადის მით უფრო მკაცრი ხდება რეზოლუცია და მით უფრო მცირდება საქართველოს შანსები, რომ რაიმე წარმატებას მიაღწიოს ევროინტეგრაციის მიმართულებით. ანდაზა, რომ არის „თაგვმა თხარა, თხარაო, კატა გამოთხარაო“, ივანიშვილმა გამოთხარა კატა და შესაბამისად, არ ვიცი რამდენად სწრაფად გადაითარგმნება ეს მოწოდება ქმედებაში, მაგრამ ივანიშვილი, ფაქტობრივად, უკვე დასანქცირებულია, რადგან მასთან საქმეს უკვე აღარავინ დაიჭერს. ეს უკვე ნიშნავს იმას, რომ ამ ადამიანთან საქმის დაჭერა არის საფრთხის შემცველი.
განსხვავებით წინა ორი რეზოლუციისა, აქ უკვე პირდაპირ არის პარალელი გავლებული სააკაშვილის მდგომარეობასა და საქართველოს ევროკავშირის კანდიდატის სტატუსს შორის. მანამდე არასდროს ყოფილა ლაპარაკი, რომ სააკაშვილის როგორც მოექცევით ციხეში ეს არის ლუსტრაცია იმისა, რა მდგომარეობაშია თქვენი ინსტიტუტები, რა მდგომარეობაშია ქვეყანა და როგორ იმართება სახელმწიფოო. აქამდე არ ყოფილა ეს ტოლობის ნიშანი და დღეს უკვე დაისვა ეს ტოლობის ნიშანი და არავის არ უნდა გაუკვირდეს. როდესაც ამბობენ, რომ „რა უსამართლობაა, მიხეილ სააკაშვილზეა დამოკიდებული მოგვცემენ თუ არა კანდიდატის სტატუსს“ - ასეა უკვე, ოღონდ მიხეილ სააკაშვილზე კი არ არის დამოკიდებული, არამედ მიხეილ სააკაშვილის დღევანდელი მდგომარეობა არის ნათელი დადასტურება იმისა, თუ რა დღეშია დღეს სახელმწიფო ინსტიტუტები“, - განაცხადა რუხაძემ.
