ნებისმიერ პატიმარს შეუძლია იგივე გაიმეოროს - დაიკლოს წონაში ხელოვნურად, რასაც სააკაშვილი აკეთებს და ეს თუ მისი გათავისუფლების გარანტია იქნება, ვერცერთი საპატიმრო დაწესებულება ნორმალურ ფუნქციონირებას ვეღარ გააგრძელებს,- ამის შესახებ „ქართული ოცნების“ თავმჯდომარე ირაკლი კობახიძემ ჟურნალისტებს განუცხადა იმის თაობაზე, რომ მიხეილ სააკაშვილის უფლებადამცველები მისთვის სასჯელის გადავადების ან სასჯელისგან გათავისუფლების თაობაზე სტრასბურგის სასამართლოსთვის მიმართვას აპირებენ.

კობახიძის თქმით, „სტრასბურგმა რომ ასეთი სარჩელი დააკმაყოფილოს, გამოდის, რომ მთელი ევროპის მასშტაბით სასჯელაღსრულების სისტემები ბოლომდე უნდა ჩამოშალოს“.

„ერთხელ მაინც თუ დაუშვებს სასამართლო პრეცედენტს, რომ ადამიანი ხელოვნურად იკლებს წონაში და ეს მისი გათავისუფლების საფუძველი ხდება, ვერცერთი ციხე ვეღარ იმუშავებს. ნებისმიერ პატიმარს შეუძლია იგივე გაიმეოროს - დაიკლოს წონაში ხელოვნურად, რასაც სააკაშვილი აკეთებს და ეს თუ მისი გათავისუფლების გარანტია იქნება, ვერცერთი საპატიმრო დაწესებულება ნორმალურ ფუნქციონირებას ვეღარ გააგრძელებს. ვერ ვხედავ ამ საქმის მათთვის სასიკეთოდ დასრულების პერსპექტივას“,- განაცხადა ირაკლი კობახიძემ.