სირცხვილია, რომ ამ კაცს სულ რამდენიმე წლის წინ საქართველოს პრეზიდენტი ერქვა - ეს ყველაფერი მართლა სირცხვილია! - ასე ეხმაურება საპარლამენტო უმრავლესობის ლიდერი ირაკლი კობახიძე გიორგი მარგველაშვილის მიერ ერთ-ერთ სატელევიზიო ეთერში გაკეთებულ განცხადებას იმის თაობაზე, რომ რეალური ჰგონია, ქართული სახელმწიფო შეიარაღებული ძალებით რუსეთს დაეხმაროს და ქართველ ჯარისკაცებს მოუწოდოს, წავიდნენ და უკრაინაში იომონ.

კობახიძის თქმით, მარგველაშვილისგან ასეთი განცხადება გასაკვირი არ არის.

„არ მიკვირს არც ჯარის და არც ნებისმიერი ქართველის აღშფოთება. მით უმეტეს, რომ რამდენიმე წლის წინ გიორგი მარგველაშვილს საქართველოს პრეზიდენტი ერქვა, ფორმალურად, მაგრამ ერქვა მთავარსარდალი. როცა ის ასეთ სამარცხვინო განცხადებებს აკეთებს, რა თქმა უნდა, ეს მძიმე მოსასმენია - პირველ რიგში, ჯარისთვის.

აქედან გამომდინარე, მათი აღშფოთება არ მიკვირს. უბრალოდ, მარგველაშვილისგან საერთოდ არაფერია გასაკვირი - პრეზიდენტის პოსტზე ის იყო სამარცხვინო და დღესაც აგრძელებს სამარცხვინო საქმიანობას", - განაცხადა ირაკლი კობახიძემ.