გარემოს დაცვისა და სოფლის მეურნეობის სამინისტროში პროექტის „გადავარჩინოთ ბუნება- საქართველო 2021-2024“ მიმდინარეობის საკითხები განიხილეს,- ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.

უწყების ცნობით, პროგრამა „გადავარჩინოთ ბუნება - საქართველო 2021-2024“ შემუშავებულია გარემოს დაცვისა და სოფლის მეურნეობის სამინისტროს მიერ, შვედეთის საელჩოსთან თემატური დიალოგის საფუძველზე.

„პროგრამა დაკავშირებულია ბიომრავალფეროვნებისა და ჰაერის ხარისხის მონიტორინგის მიმართულებებით საქართველოს მთავრობის მიერ განსაზღვრულ სტრატეგიებთან და სამოქმედო გეგმებთან. აღსანიშნავია, რომ, ამ ეტაპზე, პროექტის ბიუჯეტი 6 მილიონ ევრომდეა.

შეხვედრაზე, გარემოს დაცვისა და სოფლის მეურნეობის მინისტრმა, ოთარ შამუგიამ ინფორმაცია მოისმინა კრწანისის ტყეპარკში ჭალის ტყეების აღდგენის გეგმის, დაცული ტერიტორიების მართვის სისტემის გაუმჯობესების პროექტით გათვალისწინებული საკითხების, ასევე, ბიომრავალფეროვნების კონსერვაციისა და მონიტორინგის მიმართულებით განხორციელებული და დაგეგმილი ღონისძიებების შესახებ.

შეხვედრას სამინისტროს შესაბამისი სამსახურების ხელმძღვანელი პირები ესწრებოდნენ“, - აღნიშნულია გავრცელებულ ინფორმაციაში.