ვფიქრობთ ამერიკული კანონი პირდაპირ ვთარგმნოთ ერთი-ერთში. მერე აღარ იტყვიან, რომ ეს არის რუსული კანონი. თუ მაინც იტყვიან, მაშინ ამერიკაში ყოფილა რუსული კანონმდებლობა და ჩვენ რაღას გვერჩიან? - ამის შესახებ ჟურნალისტებთან საპარლამენტო უმრავლესობის წევრმა გურამ მაჭარაშვილმა „უცხოური გავლენის აგენტების“ შესახებ პროექტზე კომენტირებისას განაცხადა.

მაჭარაშვილი ამბობს, რომ ამერიკული პროექტის კოპირებით, „უფრო გართულდება და დამძიმდება პროცესი“, ვიდრე მათ მიერ შემოთავაზებული კანონპროექტით.

„მოხარული ვართ, რომ „ხალხის ძალის“ ეს ინიციატივა ძალიან სწრაფად აიტაცა ევროკავშირმა და იქაც ანალოგიური საკითხი დაინიცირდა. ჩვენ, „ხალხის ძალას“ ამის მერეც ძალიან ბევრი კარგი ინიციატივა გვექნება და თუ მოგვბაძავს ევროპარლამენტი ამაშიც, იქნება ძალიან კარგი. რაც შეეხება იმას, რომ კამათი გამოიწვია ჩვენმა პროექტმა, როგორც ევროპარლამენტში თქვეს, რომ სურთ ამერიკული კანონი „გადმოაკოპირონ“ და ისე დააინიცირონ, ჩვენც ვფიქრობთ, რომ შეიძლება დავაკოპიროთ ამერიკული კანონი, თუმცა უფრო გართულდება და დამძიმდება პროცესი, ვიდრე ჩვენს მიერ შემოთავაზებული პროექტით. ჩვენ გვაქვს შესაძლებლობა კომიტეტზე შევცვალოთ მთელი რიგი პუნქტები, რადგან ამერიკული კანონის შერბილებამ პირიქით რეაქცია გამოიწვია და ითქვა, რომ შერბილება ყოფილა რუსული კანონი. ჩვენ ვფიქრობთ, არც ვენეციაში და არსად გასაგზავნი რომ არ იყოს, ხომ არ გავაკეთოთ ისე, რომ პირდაპირ ვთარგმნოთ ამერიკული კანონი ერთი-ერთში. მერე აღარ იტყვიან, რომ ეს არის რუსული კანონი და თუ მაინც იტყვიან, მაშინ ამერიკაში ყოფილა რუსული კანონმდებლობა და ჩვენ რაღას გვერჩიან?“, - განაცხადა მაჭარაშვილმა.

ცნობისათვის, „ხალხის ძალის“ დეპუტატების მიერ პარლამენტში წარდგენილი კანონპროექტით, „უცხოური გავლენის გამჭვირვალობის უზრუნველყოფის მიზნით“ უცხოური გავლენის აგენტების რეესტრი შეიქმნება, სადაც ყველა ის არასამეწარმეო იურიდიული პირი და მედიასაშუალება დარეგისტრირდება, რომელთა შემოსავლების 20%-ზე მეტი უცხოური ძალების მიერ ფინანსდება.

შეგახსენებთ იმასაც, რომ აშშ- ის სახელმწიფო დეპარტამენტის პრესსპიკერის, ნედ პრაისის განცხადებით, არასამთავრობო და მედიაორგანიზაციების შესახებ კანონპროექტმა, რომელიც „უცხოური გავლენის აგენტების რეესტრის“ შექმნას გულისხმობს, შეიძლება შეარყიოს საქართველოს ევროატლანტიკური ინტეგრაცია. ამასთან, ნედ პრაისის თქმით, ის არ ეფუძნება ამერიკულ კანონმდებლობას და უფრო რუსეთის და უნგრეთის კანონმდებლობის ანალოგიურია.