საქართველოს ადვოკატთა ასოციაციის ცნობით, ევროპის საბჭოს მხარდაჭერით, მართლმსაჯულების საკოორდინაციო საბჭოს (Bench-Bar) მორიგი სამუშაო შეხვედრა გაიმართა.

როგორც მათ მიერ გავრცელებულ ინფორმაციაშია აღნიშნული, შეხვედრაზე ადვოკატებმა, პროკურორებმა და მოსამართლეებმა ნაფიც მსაჯულთა სასამართლოსთან დაკავშირებულ ისეთ საკითხებზე იმსჯელეს, როგორებიცაა - მსაჯულთა ინსტრუქციები, აცილება, შერჩევა, მტკიცებულებათა გამოკვლევა, პროცესის ეფექტიანი მართვა და სხვა.

„შეხვედრის ფარგლებში შემუშავდა შესაბამისი რეკომენდაციები და სამომავლო გეგმები. შეხვედრაში ასევე მონაწილეობდნენ ევროპის საბჭოს კონსულტანტი ჯერემი მაკბრაიდი და ამერიკის შეერთებული შტატების საელჩოს უფროსი მრჩეველი მართლმსაჯულების საკითხებში პატრიცია ვილდერმუტი.

მართლმსაჯულების საკოორდინაციო საბჭოს (Bench-Bar) მიზანია ხელი შეუწყოს იურიდიული პროფესიის გაძლიერებას, პროფესიათა შორის ურთიერთპატივისცემას, ჯანსაღი კოლეგიალური დამოკიდებულებებისა და საერთო ეთიკური პრინციპების დამკვიდრებას საქართველოში“, - აღნიშნულია ინფორმაციაში.