საქართველოს ტექნიკური უნივერსიტეტის რექტორი, პროფესორი დავით გურგენიძე, უნივერსიტეტის სახელით, სამძიმარს უცხადებს ლიეტუველ ხალხს ეროვნული მოძრაობის გამორჩეული ლიდერის, ლიეტუვის დამოუკიდებლობის აღდგენის ერთ-ერთი შემოქმედისა და ცნობილი მამულიშვილის, ანტანას ტერლიაცკასის გარდაცვალების გამო.

ამის შესახებ ინფორმაციას სტუ ავრცელებს.

„საქართველოს ტექნიკური უნივერსიტეტის სახელით, სამძიმარს ვუცხადებ ლიეტუველ ხალს, დიდი მამულიშვილის, ეროვნული მოძრაობის გამორჩეული ლიდერის და ლიეტუვის დამოუკიდებლობის აღდგენის ერთ-ერთი შემოქმედის, ბატონი ანტანას ტერლიაცკასის გარდაცვალების გამო.

ანტანას ტერლიაცკასი დააკლდა არა მხოლოდ ლიეტუვას, არამედ თავისუფლებისა და დემოკრატიისთვის მებრძოლ სამყაროს. სამართლიანობისათვის მისი დაუღალავი ბრძოლა სამაგალითო იყო თანამედროვეთათვის და მისაბაძი იქნება მომავალი თაობებისათვის, რადგან ფუნდამენტური ეროვნული ღირებულებების დაცვა კაცობრიობისთვის ყოველთვის უმთავრესი იქნება.

ჩვენთვის, საქართველოს ტექნიკური უნივერსიტეტის აკადემიური პერსონალისთვის, ბატონი ანტანასის გარდაცვალება ორმაგად მტკივნეულია - ის უნივერსიტეტის დიდი მეგობარი იყო. ჩვენ გვქონდა მასთან შეხვედრის ბედნიერება. საუბრისას ის ყოველთვის ხაზს უსვამდა თბილ დამოკიდებულებას, როგორც საქართველოს, ასევე საქართველოს ტექნიკური უნივერსიტეტის მიმართ.

ანტანას ტერლიაცკასი იყო პოლიტიკური და საზოგადო მოღვაწე, იატაკქვეშა პრესის გამომცემელი, დისიდენტი; მთელი შეგნებული ცხოვრების მანძილზე იბრძოდა სამშობლოს დამოუკიდებლობის აღდგენისთვის, რითაც მაგალითს აძლევდა თავისუფლებისთვის მებრძოლ ერებს. სწორედ 16 თებერვალს, ლიეტუვის სახელმწიფოს აღდგენის დღეს, 95 წლის ასაკში, გარდაიცვალა ადამიანი, რომელმაც ყველაფერი გააკეთა სამშობლოს დამოუკიდებლობისთვის. მსუბუქი იყოს მისთვის ლიეტუვის მიწა!“ - აღნიშნულია საქართველოს ტექნიკური უნივერსიტეტის რექტორის, პროფესორ დავით გურგენიძის სამძიმრის წერილში.