სხვადასხვა სამედიცინო ჩარევის მიხედვით, 609 DRG კოდი გენერირდება და ამ ტარიფებში კლინიკების ნებისმიერი დამატებითი მომსახურებაც ასახულია, - ამის შესახებ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა ზურაბ აზარაშვილმა განაცხადა.

როგორც მან პარლამენტის ჯანმრთელობის დაცვისა და სოციალურ საკითხთა კომიტეტის სხდომაზე აღნიშნა, DRG სისტემის დანერგვის შემდეგ, სამინისტრომ კლინიკებს სთხოვა, პაციენტებისთვის დამატებითი გადასახადი არ დაეკისრებინათ.

„გასული წლის 1-ლი ნოემბრიდან, საყოველთაო ჯანდაცვაში ჩართული კლინიკებისთვის ახალი გადახდის სისტემა დავნერგეთ. ეს სისტემა მსოფლიოში კარგად აპრობირებულია და DRG სისტემის სახელით არის ცნობილი. სისტემის მიხედვით, კონკრეტულ დიაგნოზებზე გადასახდელი ტარიფების დაანგარიშება რთული კვლევით ხდება.

დღეს, სხვადასხვა სამედიცინო ჩარევის მიხედვით, 609 DRG კოდი გენერირდება. თითოეულ მათგანს თავისი წონა აქვს. სახელმწიფოს მიერ გადახდილ თანხას ის თანხა დავამატეთ, რასაც პაციენტებს ახდევინებდნენ და ის საბაზისო ტარიფი გამოვიყვანეთ, რომლის მიხედვითაც თითოეულ DRG-ზე თანხა ანაზღაურდება. დღეს არსებულ ტარიფებში კლინიკების ნებისმიერი დამატებითი მომსახურებაც ასახული და შესულია. სისტემის შემოსვლის შემდეგ, კლინიკებს ვთხოვეთ, რომ პაციენტებისთვის დამატებითი გადასახადი არ დაეკისრებინათ“, - განაცხადა ზურაბ აზარაშვილმა.

ცნობისთვის, 2022 წლის 1-ელი ნოემბრიდან საქართველოში კლინიკების დაფინანსების მექანიზმი შეიცვალა. კერძოდ, სამედიცინო დაწესებულებებში, მომსახურების დიაგნოზთან შეჭიდული ჯგუფებით დაფინანსების ახალი მოდელი ამოქმედდა. DRG სისტემით დაფინანსების მოცულობას პაციენტის დიაგნოზი, ასაკი, ჰოსპიტალიზაციის ხანგრძლივობა და სხვა კრიტერიუმები განსაზღვრავს. ცალკეული მომსახურებისთვის კლინიკებს პაციენტებისთვის დამატებითი ანაზღაურების მოთხოვნის უფლება აღარ ექნება. DRG სისტემის დანერგვის შემდეგ, სამედიცინო მომსახურების მიღებისას, პაციენტი მხოლოდ იმ თანხას გადაიხდის, რასაც საყოველთაო ჯანდაცვის პროგრამის ფარგლებში, თანაგადახდის წილი ითვალისწინებს (0-დან 30%-მდე, საყოველთაო ჯანდაცვის პროგრამის პაკეტების შესაბამისად).

შეგახსენებთ იმასაც, რომ აღნიშნული მოდელი მხოლოდ საყოველთაო ჯანდაცვის პროგრამას ეხება და არ ვრცელდება კერძო სადაზღვევო კომპანიებსა და კლინიკებზე. აღნიშნულ პროგრამამდე სახელმწიფო ჰოსპიტალს კონკრეტულ შემთხვევაზე დადგენილი ტარიფების მიხედვით უხდიდა ანაზღაურებას.