ჯანდაცვის მინისტრის ზურაბ აზარაშვილის განცხადებით, 2025 წლიდან საყოველთაო ჯანდაცვაში ჩართული ყველა კლინიკისთვის სავალდებულო იქნება საერთაშორისო აკრედიტაციის გავლა და აკრედიტაციის გამცემი კომპანიიდან ჯანდაცვის სამინისტროში შესაბამისი სერტიფიკატის მიტანა იმისათვის, რომ კლინიკამ სახელმწიფო დაფინანსებით მომსახურების შეთავაზება გააგრძელოს.

აზარაშვილის განმარტებით, ჯანდაცვის სამინისტრო 2025 წელს არ დაელოდა და ამ მიმართულებით მუშაობა უკვე დაიწყო.

„წინა წელს დავიწყეთ და რამდენიმე მიმართულებისთვის სტანდარტები შევქმენით. ერთის მხრივ, კარგია, რომ ამ ორი წლის განმავლობაში მოლოდინის პროცესში არ ვიყოთ, კლინიკები უკვე მობილიზებულები იყვნენ და გაუმარტივდეთ 2025 წლისთვის ამ პირობების შესრულება, რასაც შემდეგ ის საერთაშორისო მააკრედიტებლები მოსთხოვენ. შემოვიტანეთ რეანიმაციის სტანდარტი, სხვადასხვა რეპროდუქციულ ჯანმრთელობასთან დაკავშირებული სტანდარტები და ა.შ. დავამატებ იმას, რომ 2025 წლიდან კი არის სავალდებულო საერთაშორისო აკრედიტაცია, მაგრამ სამწუხაროდ, როგორც ხშირად პრაქტიკა გვაჩვენებს საქართველოში, ბოლო პერიოდამდე არ იწყებენ მოქმედებას, ამიტომ ერთი შუალედური პირობა ჩავდეთ - კლინიკები არ დაელოდონ 2025 წელს და 2023 წლის ბოლოს ვალდებულები არიან თვითშეფასება გაკეთებული ჰქონდეთ, სულ მცირე, კონტრაქტი წარმოადგინონ რომელიმე კომპანიასა, რომელსაც შეარჩევენ, რათა შემდეგ ისე არ მოხდეს რომ 2024 წლის ბოლოს გადავადებაზე თხოვნებით შემოვიდნენ“,- აცხადებს აზარაშვილი.