უკრაინიდან ლტოლვილებს ყოველთვიურად ზუსტად იგივე ოდენობის დახმარება აქვთ დანიშნული, როგორც ჩვენს დევნილებს - საჭიროების შემთხვევაში ბინის ქირითაც უზრუნველვყოფთ და ბინის ქირასაც ზუსტად იგივე ოდენობით ვუხდით, რასაც ჩვენი დევნილი მოსახლეობისთვის ვაკეთებთ, - ეს განცხადება ჟურნალისტებთან ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა ზურაბ აზარაშვილმა გააკეთა.

აზარაშვილის თქმით, სახელმწიფო უკრაინიდან შემოსული ლტოლვილების დახმარების საკითხში ომის პირველივე დღიდან ჩაერთო.

„მოგეხსენებათ, პირველი სამი თვე სასტუმროებში მათ ცხოვრებას სრულად უზრუნველვყოფდით. შემდეგ მათზე ზრუნვა ჩვენს სამინისტროში გადმოვიდა. დევნილთა სააგენტო საქმეს საკმაოდ წარმატებულად უძღვება. ლარსის გამშვებ სასაზღვრო პუნქტზე და კიდევ რამდენიმე ლოკაციაზე სპეციალური პუნქტები გვაქვს, სადაც საჭიროების შემთხვევაში ლტოლვილები მიმართავენ და ჩვენ უკვე ათასობით ადამიანსა და ოჯახს დავეხმარეთ. რამდენიმე ათეული მილიონი ლარი ომის დღიდან ამ დახმარების კუთხით გადავიხადეთ“, - განაცხადა ზურაბ აზარაშვილმა.