სირიის განცხადებით, ხუთი ადამიანი დაიღუპა კვირას, დედაქალაქ დამასკოსა და მიმდებარე ტერიტორიებზე ისრაელის სარაკეტო დარტყმის შედეგად.

ოფიციალურმა პირებმა განაცხადეს, რომ დაღუპულია ოთხი მშვიდობიანი მოქალაქე და ერთი სამხედრო.

“როიტერსის” ცნობით, მომხდარზე ისრაელის მხარეს მედიასთან კომენტარი არ გაუკეთებია.

ამასთან, როგორც მედიასაშუალება წერს, ისრაელი ხშირად ესხმის თავს სირიაში არსებულ სამიზნეებს, რომლებიც ირანთან და ჰეზბოლას მებრძოლებთანაა დაკავშირებული, თუმცა იშვიათად აღიარებს საკუთარ ქმედებებს.

სირიის ოფიციალური პირების თქმით, იერიში ადგილობრივი დროით 00:22 საათზე მოხდა. როგორც ქვეყნის თავდაცვის სამინისტრომ განაცხადა, რაკეტები გოლანის მაღლობებიდან გაუშვეს, რომელიც 1981 წელს ისრაელის მიერ იქნა ანექსირებული.