უკრაინის ომისთვის, ჩინეთი რუსეთისთვის იარაღისა და საბრძოლო მასალის მიცემას განიხილავს. ამის შესახებ ამერიკის შეერთებული შტატების სახელმწიფო მდივანმა ენტონი ბლინკენმა განაცხადა.

ბლინკენმა CBS News-ს განუცხადა, რომ ჩინური კომპანიები რუსეთს „არალეტალურ მხარდაჭერას“ უკვე უწევდნენ, ახალი ინფორმაციის საფუძველზე კი სახელმწიფო მდივანი აცხადებს, რომ პეკინმა შესაძლოა მოსკოვს „ლეტალური მხარდაჭერა“ გაუწიოს.

აშშ-ის პირველი დიპლომატის თქმით, ამ ესკალაციას ჩინეთისთვის "სერიოზული შედეგები" ექნება.

ბლინკენი CBS-ს მას შემდეგ ესაუბრა, რაც შაბათს, მიუნხენის უსაფრთხოების კონფერენციაზე ჩინეთის მთავარ დიპლომატს, ვან ის შეხვდა.

როგორც აშშ-ის სახელმწიფო მდივანმა აღნიშნა, ჩინელ კოლეგასთან შეხვედრისას მან "ღრმა შეშფოთება" გამოთქვა იმ შესაძლებლობასთან დაკავშირებით, რომ ჩინეთი რუსეთს ლეტალურ მატერიალურ მხარდაჭერას გაუწევს.