ამერიკული კანონის მიზანი იყო ფაშისტური იდეოლოგიის გაჩერება. რა მიზანი აქვს „ხალხის ძალის“ კანონს? ამბობენ, რომ დღეს ასეთივე საფრთხეა ჩვენთვის დასავლური დახმარება?! ასეთი საფრთხეა იმ სახელმწიფოების დახმარება, რომლებმაც ფაშიზმი დაამარცხეს?! - ამის შესახებ ჟურნალისტებთან დამოუკიდებელმა დეპუტატმა თამარ კორძაიამ განაცხადა.

როგორც მან აღნიშნა, კანონი ხელისუფლების მაკონტროლებლებს შეზღუდავს.

„სახელმწიფოსთან რაც მიდის (თანხა), ის არ უნდა იყოს გამჭვირვალე და რაც არასამთავრობო ორგანიზაციებთან მიდის, ის უნდა იყოს გამჭვირვალე?! სინამდვილეში ეს ტყუილია. სახელმწიფოს რომ ფულს აძლევენ გრანტების სახით, ამ ფულის ხარჯვის კანონიერების შესასწავლად ცოტა ფული გაიცემა არასამთავროვო ორგანიზაციებზე და მედიაზე, რომ ამ სუბიექტებმა გააკონტროლონ, რამდენად კანონიერად იქცევა ხელისუფლება. ეს კანონი გვეუბნება, რომ ვინც ხელისუფლებას აკონტროლებს, ისინი უნდა შევზღუდოთო,“ - განაცხადა კორძაიამ.

ცნობისთვის, „ხალხის ძალის“ დეპუტატების მიერ პარლამენტში წარდგენილი კანონპროექტით, „უცხოური გავლენის გამჭვირვალობის უზრუნველყოფის მიზნით“ უცხოური გავლენის აგენტების რეესტრი შეიქმნება, სადაც ყველა ის არასამეწარმეო იურიდიული პირი და მედიასაშუალება დარეგისტრირდება, რომელთა შემოსავლების 20%-ზე მეტი უცხოური ძალების მიერ ფინანსდება.

შეგახსენებთ იმასაც, რომ აშშ- ის სახელმწიფო დეპარტამენტის პრესსპიკერის, ნედ პრაისის განცხადებით, არასამთავრობო და მედიაორგანიზაციების შესახებ კანონპროექტმა, რომელიც „უცხოური გავლენის აგენტების რეესტრის“ შექმნას გულისხმობს, შეიძლება შეარყიოს საქართველოს ევროატლანტიკური ინტეგრაცია. ამასთან, ნედ პრაისის თქმით, ის არ ეფუძნება ამერიკულ კანონმდებლობას და უფრო რუსეთის და უნგრეთის კანონმდებლობის ანალოგიურია.