პრემიერ-მინისტრ ირაკლი ღარიბაშვილის განცხადებით, საქართველოში უმუშევრობა და სიღარიბის დონე ისტორიულ მინიმუმზეა. როგორც მან მთავრობის დღევანდელ სხდომაზე აღნიშნა, ეს ხელისუფლების პოლიტიკის შედეგია, რადგან „ქართულ ოცნებას“ სხვა ნაბიჯები რომ გადაედგა, „დღეს არავითარ ეკონომიკურ კეთილდღეობაზე საუბარი არ იქნებოდა“.

„ბოლო ინფორმაცია, რაც გამოქვეყნდა სტატისტიკის დეპარტამენტის მიერ, უმუშევრობის დონე არის ისტორიულ მინიმუმზე, უმუშევრობა შემცირდა. ასევე, სიღარიბე არის ისტორიულ მინიმუმზე. თქვენ გაეცანით ბოლო მონაცემებს, რომ ვაჭრობა არის ყველა მიმართულებით გაზრდილი, ჩვენს გვაქვს პოზიტიური დინამიკა, ეკონომიკის ზრდა. წინასწარი ინფორმაცია მაქვს ფინანსთა სამინისტროსგან, თუმცა, საბოლოო ინფორმაციას უნდა დაველოდოთ სტატისტიკის სამსახურიდან. იანვარში საკმაოდ მაღალი ეკონომიკური ზრდა იქნება. ზოგადად, დინამიკა, რაც იკვეთება, ოპტიმიზმის საფუძველს გვაძლევს, რომ წელსაც მაღალი ეკონომიკური ზრდა გვქონდეს. ეს უნდა იყოს ჩვენი მთავარი ამოცანა: დასაქმება, მეტი სამუშაო ადგილები. ასევე გეტყვით, რომ უმუშევართა რაოდენობაც არის შემცირებული, როგორც კაცებში, ასევე ქალებში. ქალაქად და სოფლად ყველგან არის უმუშევრობა შემცირებული. ეს არის ისტორიული მინიმუმი, როგორც უმუშევრობა, ასევე სიღარიბე. ეს არის ჩვენი 2 წლის მუშაობის შედეგი. მინდა ხაზგასმით აღვნიშნო, თუ რაოდენ დიდი მნიშვნელობა აქვს ჩვენს პოლიტიკას. ყველაფერი ჩვენი ქვეყნის ეროვნულ უსაფრთხოებას უკავშირდება. ჩვენ რომ სხვა ნაბიჯები გადაგვედგა, დღეს არავითარ ეკონომიკურ კეთილდღეობაზე საუბარი არ იქნებოდა. მოგეხსენებათ, მიუნხენში ვიმყოფებოდი, ძალიან რთული ვითარებაა. საერთოდ ამ სიტუაციაში გამოსავალი არ ჩანს, არ იციან, როდის დასრულდება უკრაინაში ომი. ასე,რომ ჩვენ უნდა გავაგრძელოთ ჩვენი ქვეყნის ეროვნული ინტერესების დაცვა და იმ ინტერესების გატარება, რომელიც მხოლოდ ჩვენს ხალხს, ჩვენს ქვეყანას სჭირდება“,-განაცხადა ღარიბაშვილმა.