„საქართველოს ბანკის“ ყაჩაღობაში ბრალდებულ ბადრი ესებუას საქმის პროკურორის, მირანდა წერეთლის განცხადებით, პროკურატურის მიერ წარდგენილი მტკიცებულებებით ესებუას მიერ დანაშაულის ჩადენა დადასტურდება.

როგორც პროკურორი განმარტავს, ბრალდების მხარეს საქმეში საკმარისი მტკიცებულებები აქვს.

„დღეს წარმოდგენილი გვყავს მოწმეები, დაზარალებულები, რომლებიც დაიკითხებიან სასამართლოს წინაშე. ბრალდების მხარეს, მოცემულ სისხლის სამართლის საქმეზე უტყუარი მტკიცებულებები აქვს წარდგენილი, ამ მტკიცებულებების საფუძველზე მისი თანამონაწილეობა დადასტურდება, რომელზეც ის დაკავებულია. ბრალდების მხარეს მტკიცებულებები შეკრებილი აქვს, რიგ მტკიცებულებებთან დაკავშირებით შუამდგომლობებს წარადგენს, ეტაპობრივად გამოიკვლევს და იმასაც გეტყვით, რომ სისხლის სამართლის საქმეში უკვე წარდგენილი მტკიცებულებები სრულიად საკმარისია იმისთვის, რომ სასამართლომ გამამტყუნებელი განაჩენი გამოიტანოს",- განაცხადა წერეთელმა.