პაატა მანჯგალაძე - „ქართული ოცნება“ ამბობდა, ევროპას დემოკრატიით გავაკვირვებთო - ეს არის ევროპის გაკვირვება, კალიგულას მეთოდით რომ უსწორდები ოპონენტს?
არ შეიძლება სახლში იჯდე და ელოდებოდე როდის მოკვდება სააკაშვილი - მე არ მინდა, რომ ყოფილ ლიდერებს დარიშხანით კლავდნენ და ამის გასაპროტესტებლად ვარ მოსული, რათა შეიგნოს ხელისუფლებამ, რომ ეს არ არის ევროპული გზა , - ამის შესახებ "სტრატეგია აღმაშენებლის" ერთ-ერთმა ლიდერმა პაატა მანჯგალაძემ მთავრობის ადმინისტრაციასთან, ყოფილი პრეზიდენტის მიხეილ სააკაშვილის მხარდამჭერ აქციაზე განაცხადა.
მისი თქმით,"ქართული ოცნების" სტრატეგიაა, გაუსწორდნენ მათთვის „უხერხულ ოპონენტს“, მიხეილ სააკაშვილს.
"ნორმალური მთავრობის და დემოკრატიული მმართველობის პირობებში არც ეს აქცია დაგვჭირდებოდა, რადგან არავინ არ მოკლავდა ოპონენტს. ამერიკელმა ექსპერტმა თქვა, რომ მოწამლულია დარიშხანით და მძიმე მეტალებით და არ შეიძლება სახლში იჯდე და ელოდებოდე, როდის მოკვდება სააკაშვილი. რა სტანდარტსაც დააწესებენ სააკაშვილის მისამართით, ისე მოექცევიან "ქართულ ოცნებას". მე არ მინდა, რომ ყოფილ ლიდერებს დარიშხანით კლავდნენ და ამის გასაპროტესტებლად ვარ მოსული, რათა შეიგნოს ხელისუფლებამ, რომ ეს არ არის ევროპული გზა, ეს არ არის საქართველოს ეროვნული ინტერესი, რომ როგორც ზვიად გამსახურდია მოკლეს, ისე მოკლან პრეზიდენტები და მმართველები. მე მინდა მშვიდობიანი, უსაფრთხო განვითარება საქართველოსთვის.
"ქართული ოცნება" რომელიც ამბობდა, რომ გავაკვირვებთ დემოკრატიით ევროპასო - ეს არის ევროპის გაკვირვება, რომ კალიგულას მეთოდით უსწორდები ოპონენტს?! ეს არის სამარცხვინო, რასაც "ქართული ოცნება" აკეთებს.
"ქართული ოცნების" სტრატეგიაა, გაუსწორდნენ მათთვის უხერხულ ოპონენტს სააკაშვილს და ასიამოვნონ პუტინს, რადგან ეს რეჟიმი ეყრდნობა პუტინის გულის მოგების სტრატეგიულ ამოცანას", - განაცხადა მანჯგალაძემ.
