თბილისის საკრებულოს ურბანული დაგეგმარებისა და საქალაქო მეურნეობის კომისიის თავმჯდომარის რევაზ სოხაძის განცხადებით, 2021 წელს GWP-ს შემოსავალი 54%-ით გაიზარდა და მისი წმინდა მოგება 60 მილიონს შეადგენდა.

როგორც რევაზ სოხაძემ თბილისის საკრებულოში აღნიშნა, ვარკეთილში მოსახლეობას სამი დღეა წყალი არ მიეწოდება და მაცხოვრებლები აქციებს გეგმავენ.

„მე მინდა ყბადაღებული GWP-ს თემას შევეხო. ვსაუბრობ, როგორც სამგორის რაიონის მაჟორიტარი. ჩვენს რაიონში წარმოუდგენელი მდგომარეობაა. ცენტრალურ ქუჩებზე კანალიზაცია უწყვეტ ნაკადად მოედინება. GWP-სთან ჩვენი კომუნიკაციის შემდეგ, მათ გვითხრეს, რომ მხოლოდ ერთი მანქანა ჰყავთ. სამი დღეა ვარკეთილის ზემო პლატოზე წყალი არ არის და როგორც ვიცი, ორ საათზე მოსახლეობს აქცია აქვს დაგეგმილი. რა გზას მივმართო საკრებულოში ამ რაიონის წარმომადგენელმა იმისთვის, რომ მოსახლეობას 21-ე საუკუნეში წყალი ჰქონდეს? მე პერსპექტივას ვერ ვხედავ, რომ შეიძლება ეს პრობლემა მოგვარდეს. ერთ-ერთმა სააგენტომ გაასაჯაროვა, რომ 2021 წელს GWP-ს შემოსავალი 54%-ით გაიზარდა და 178 მილიონი შეადგინა, ხოლო წმინდა მოგება 60 მილიონი ლარი იყო", - განაცხადა რევაზ სოხაძემ.