თბილისის საკრებულოში გამართულ სხდომაზე, საკრებულოს განათლებისა და კულტურის კომისიის თავმჯდომარე, ისნის რაიონის მაჟორიტარი წევრი კახა ლაბუჩიძე, რამდენიმე საკითხს გამოეხმაურა, მათ შორის თბილისში ავარიული შენობების ჩანაცვლების პროგრამასთან დაკავშირებით განაცხადა და აღნიშნა, რომ პროგრამა თითოეული მესაკუთრის ინტერესთა დაცვით ხორციელდება. ამის შესახებ ინფორმაციას თბილისის საკრებულო ავრცელებს.

კახა ლაბუჩიძის განცხადებით, ავარიული შენობა-ნაგებობა მხოლოდ იმ შემთხვევაში ჩანაცვლდება, თუკი დაინტერესებული პირები თანახმა იქნებიან, რაც მესაკუთრის ინტერესის საზიანო ერთპიროვნულ გადაწყვეტილებას გამორიცხავს.

„გარკვეულმა მედიაორგანიზაციებმა და ოპოზიციური პარტიის წარმომადგენლებმა, საზოგადოება შეცდომაში შეიყვანეს და ავარიული შენობების ჩანაცვლების პროგრამა ისე წარმოაჩინეს, თითქოს, მოქალაქეთა საკუთრების უფლება ილახება, რაც დეზინფორმაციაა და თბილისელების შეცდენას ემსახურება. იმ ფაქტის გათვალისწინებით, რომ ცრუ პიარკამპანიამ საზოგადოება შეცდომაში შეიყვანა, საჭიროა მათთვის დამატებითი განმარტების გაკეთება. მზად ვართ ამ მიმართულებით იმდენჯერ შევხვდეთ ჩვენს თანამოქალაქეებს, რამდენჯერაც ამის საჭიროება იქნება“, - აღნიშნა კახა ლაბუჩიძემ.