ბადრი ესებუას ბრალდების საქმეზე სასამართლო დაზარალებულების გამოკითხვას იწყებს

„საქართველოს ბანკის“ ყაჩაღობაში ბრალდებულ ბადრი ესებუას საქმის პროკურორის, მირანდა წერეთლის განცხადებით, ბრალდების მხარე დაცვის მხარის პოზიციას ელოდება წინა პროცესზე წარდგენილ შუამდგომლობასთან დაკავშირებით, რომლის თანახმადაც, ბრალდება ესებუას ხმისა და სუნისა ექსპერტიზის ჩატარებას ითხოვდა.

წერეთლის თქმით, დღევანდელ სხდომაზე ასევე გამოიკითხებიან დაზარალებულები.

„ვაგრძელებთ საქმის განხილვას, ველოდებით დაცვის მხარის პოზიციას ჩვენს მიერ წარდგენილ შუამდგომლობებთან დაკავშირებით. მათ პოზიციას ჩვენ მოვისმენთ ოფიციალურად დაცვის მხარის მიერ, რასაც გააჟღერებს სასამართლო სხდომაზე, შესაბამისად, გვექნება გარკვეული არგუმენტები იმის მიხედვით, რა პოზიციაც ექნება დაცვის მხარეს. ამის შემდეგ გამოიტანს სასამართლო გადაწყვეტილებას. დღევანდელ სასამართლო სხდომაზე გამოიკითხებიან დაზარალებულები და მოწმეები, უშუალოდ ის პირები, რომლებიც შეესწრნენ ამ ფაქტს“, - განაცხადა პროკურორმა.

ცნობისთვის, ზუგდიდში, „საქართველოს ბანკის“ შენობაში შეიარაღებული ბადრი ესებუა 2020 წლის 21 ოქტომბერს შეიჭრა. მას მძევლად 40-ზე მეტი მოქალაქე ჰყავდა აყვანილი და მათი გათავისუფლების სანაცვლოდ 500 ათას აშშ დოლარს და უსაფრთხოების გარანტიებს ითხოვდა. თანხის გადაცემის შემდეგ თავდამსხმელმა გაქცევა მოახერხა. ბადრი ესებუა მიმდინარე წლის 8 თებერვალს დააკავეს. აღნიშნულ საქმეზე გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.