„საქართველოს ბანკის“ დაყაჩაღებაში ბრალდებულ ბადრი ესებუას ადვოკატი ალექსანდრე კობაიძე აცხადებს, რომ დღევანდელ სხდომაზე დაზარალებულებმა ვერ მოახდინეს მძარცველის იდენტიფიცირება.

მისივე თქმით, აქვს განცდა, რომ ბრალდების მხრიდან „შეგნებულად ხდება ბადრი ესებუას დისკრედიტაცია“.

საქმეზე შემდეგი სასამართლო პროცესი 1-ელ მარტს, 11:00 საათზე ჩატარდება.

,,ბრალდება იმ ბრალდებაზე აპელირებს, რაც წარდგენილი აქვს ბადრი ესებუას. ბრალი არის აბსტრაქტული, არ არის კონკრეტული, რადგან დაზარალებულები მოდიან და იდენტიფიცირებას ვერ ახდენენ, რომ ნამდვილად ბადრი ესებუა იყო ის მძარცველი, რომელიც [ბანკში] იყო. ასევე ამბობენ, რომ მძარცველი, რომელიც იყო არავითარ შემთხვევაში არ გამოხატავდა პოზიციას, რომ მაგალითად ტერორისტულ აქტს ჩადიოდა, რომ ეს ადამიანი სახელმწიფოსგან რამეს ითხოვდა, არცერთ მოწმეს არ დაუფიქსირებია. შესაბამისად, დანარჩენი უკვე შეფასებითია და დარწმუნებული ვარ, როდესაც სასამართლო შეაფასებს, სასამართლო მივა იქამდე, რომ აქ ტერორისტულ აქტთან არ გვაქვს კავშირი, რადგან მსგავსი რამ არ არსებობს. მაქსიმუმ იყოს ყაჩაღობის მუხლი. თუმცა კიდევ ერთხელ განვმარტავ, ბადრი ესებუასთან დაზარალებულების არანაირი შეხება არ ფიქსირდება”, - განაცხადა ალექსანდრე კობაიძემ.

ცნობისთვის, ზუგდიდში, „საქართველოს ბანკის“ შენობაში შეიარაღებული ბადრი ესებუა 2020 წლის 21 ოქტომბერს შეიჭრა. მას მძევლად 40-ზე მეტი მოქალაქე ჰყავდა აყვანილი და მათი გათავისუფლების სანაცვლოდ 500 ათას აშშ დოლარს და უსაფრთხოების გარანტიებს ითხოვდა. თანხის გადაცემის შემდეგ თავდამსხმელმა გაქცევა მოახერხა. ბადრი ესებუა მიმდინარე წლის 8 თებერვალს დააკავეს. აღნიშნულ საქმეზე გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.