„აღმოსავლეთ ევროპის ცენტრი მრავალპარტიული დემოკრატიისთვის", უკრაინის საელჩო საქართველოში და ჰოლანდიის საელჩო უკრაინაში კონფერენციას -"რუსეთის აგრესია უკრაინაში: წინააღმდეგობის ერთი წელი" მართავს. შეხვედრაზე საუბრის მთავარი თემა უკრაინაში რუსეთის აგრესია და საქართველო-უკრაინის ურთიერთობებია. ღონისძიებაში მონაწილეობენ პოლიტიკური პარტიის წარმომადგენლები, ადგილობრივი არასამთავრობო და საერთაშორისო ორგანიზაციები, აკადემიკოსები და საელჩოების წარმომადგენლები.

კონფერენციას ესწრება საქართველოში უკრაინის ელჩის მოვალეობის შემსრულებელი, ანდრეი კასიანოვი.

როგორც „აღმოსავლეთ ევროპის ცენტრი მრავალპარტიული დემოკრატიისთვის" დირექტორმა, ლევან ცუცქირიძემ განაცხადა, აღნიშნულ ღონისძიებაზე, მიწვევის მიუხედავად, ხელისუფლების არც ერთი წარმომადგენელი არ არის.

„ვფიქრობ, დღეს ჩვენ ვართ ყველაზე ცუდი ურთიერთობების ეტაპზე, რომელიც საქართველო-უკრაინას შორის ოდესმე ყოფილა. ეს არის ძალიან სამწუხარო. თუნდაც ის ფაქტი, რომ ამ კონფერენციას მართავს არასამთავრობო ორგანიზაცია პარტნიორებთან თანამშრომლობით და არა საქართველოს მთავრობა, რომლის არცერთი წარმომადგენელი დღეს არ არის ამ კონფერენციაზე, მიუხედავად იმისა, რომ საგარეო საქმეთა სამინისტროს, თავდაცვის სამინისტროს, საქართველოს პარლამენტს პირადად მივმართე წერილობითი თხოვნით როგორც ოფიციალურად, ისე არაოფიციალურად, რომ მობრძანებულიყვნენ და საკუთარი მოსაზრებები ეთქვათ. აქ მტრული გარემო არავისთვის არის. არცერთი მათგანი აქ არ არის. ეს არის იმის ნიშანი, თუ რას გეგმავს საქართველოს დღევანდელი ხელისუფლება. სამწუხაროა ეს", -განაცხადა ლევან ცუცქირიძემ.