საქართველოში უკრაინის საელჩოსთან სოლიდარობის აქცია იმართება. აქციის მონაწილეებს უკრაინაში რუსეთის სრულმასშტაბიანი შეჭრის წლისთავთან დაკავშირებით საელჩოსთან ყვავილები, უკრაინაში რუსეთის დანაშაულების ამსახველი პლაკატები აქვთ მიტანილი.

„მოგეხსენებათ, დღეს ერთი წელი შესრულდა იმ ტრაგედიიდან, რომელიც რუსეთის ფედერაციამ უკრაინაში დაატრიალა. ჩვენ გვინდა ჩვენი სიმბოლური წვლილი შევიტანოთ და უკრაინელ ხალხს მხარი დავუჭიროთ. „ამერიკის მეგობართა კლუბი“ და საზოგადოების სხვადასხვა სფეროს წარმომადგენლები ომში დაღუპული ბავშვების და მშვიდობიანი ადამიანების ხსოვნას პატივს მივაგებთ. უკრაინაში მოგეხსენებათ 450 ბავშვზე მეტია დაღუპული. სწორედ ამიტომ უკრაინის საელჩოს ჭიშკარზე სიმბოლურად ჩამოვკიდეთ ანგელოზები, რომელზეც იმ თითოეული ბავშვის სახელებია დატანილი, ვინც ომის მსხვერპლი გახდა. დღესაც რუსეთის სახელმწიფო ამ ტერორისტულ ომს უკრაინელი ხალხის წინააღმდეგ აგრძელებს“, - განაცხადა აქციის ორგანიზატორმა, ილია ზუკაკიშვილმა.