საქართველო და ქართველი ხალხი დგას თურქეთისა და თურქი ხალხის გვერდით - ისეთი გონიერი და ძლიერი ლიდერით, როგორიცაა ერდოღანი, თურქი ხალხი ამ განსაცდელს დაძლევს და კიდევ უფრო ძლიერი გამოვა ამ პრობლემიდან, - ამის შესახებ საქართველოს პრემიერ-მინისტრმა ირაკლი ღარიბაშვილმა თურქეთში ვიზიტისას ჟურნალისტებთან საუბრისას აღნიშნა.

როგორც მან განაცხადა, ეს არის საშინელი ტრაგედია, რომელიც თურქეთს თავს დაატყდა.

„ჩემი მთავარი გზავნილი თურქი ხალხის მიმართ იყო და არის შემდეგი, რომ საქართველო და ქართველი ხალხი დგას თურქეთისა და თურქი ხალხის გვერდით. მე გუშინ პრეზიდენტ ერდოღანს ეს გზავნილი და ჩემი სამძიმარი გადავეცი. მე მას დავუდასტურე ჩემი მხარდაჭერა, გამოვხატე ჩვენი სოლიდარობა. ეს არის საშინელი ტრაგედია, რომელიც თურქეთს და ჩვენს მოძმე ერს თავს დაატყდა. მოგეხსენებათ, რომ 40 ათასზე მეტი გარდაცვლილი არის დადასტურებული და 100 ათასზე მეტია დაშავებული. ათასობით ადამიანი დარჩა ბინების გარეშე. ჩვენ გქონდა გუშინ საუბარი ერდოღანთან, მან მითხრა, რომ მისი დავალებით უკვე შექმნილია შესაბამისი შტაბი, გეგმა აქვთ გაკეთებული და ერთ წელიწადში დაახლოებით 270 ათას ბინას ააშენებენ, ყველა ეს ადამიანი იქნება დაკმაყოფილებული. მე ასევე მინდა ვთქვა, რომ ჩვენი გმირი მაშველები არიან აქ, ადგილზე. ჩვენ იმავე დღეს გამოვაგზავნეთ ჩვენი მაშველები, რომლებიც თავიანთი ტექნიკით ჩამოვიდნენ ადგილზე. სამი ადამიანის გადარჩენა შეძლეს. მინდა მადლობა გადავუხადო ჩვენ გმირ მაშველებს, სამაშველო სამსახურსა და მის ხელმძღვანელობას, ვახტანგ გომელაურს, ყველას ვინც ჩართული იყო ამ სამაშველო ღონისძიებებში. მე ვარ ღრმად დარწმუნებული ისეთი გონიერი და ძლიერი ლიდერი როგორიცაა ერდოღანი, მისი ლიდერობით თურქი ხალხი ამ განსაცდელს დაძლევს და კიდევ უფრო ძლიერი გამოვა ამ პრობლემიდან“, - განაცხადა ღარიბაშვილმა.