“დიდება უკრაინას”- ამ სლოგანით უერთდებიან საქართველოში მცხოვრები უკრაინის მოქალაქეები პარლამენტთან დაგეგმილ უკრაინის სოლიდარობის აქციას.

მსვლელობის მონაწილეები თავდაპირველად "რუსთაველის" მეტროსთან შეიკრიბნენ.

უკრაინის მოქალაქეებს მხარდამჭერებთან ერთად შეუერთდნენ "ევროპული საქართველოს” წარმადგენლები სლოგანით - „ჯიუტად თავისუფლებისკენ”.

აქციის მონაწილეები სკანდირებენ: “დიდება უკრაინას”.

საქართველოს პარლამენტთან უკრაინის სოლიდარობის აქცია - “ეს არის საქართველო, დიდება გმირებს” რამდენიმე წუთში დაიწყება. აქციის მონაწილეები აცხადებენ, რომ რუსთაველის გამზირზე შეიკრიბნენ, იმისათვის, რომ კიდევ ერთხელ დააფიქსირონ უკრაინისადმი ქართველი ხალხის მტკიცე მხარდაჭერა.

მათი თქმით, ომი, რომელიც დღემდე გრძელდება, აუცილებლად უკრაინის და უკრაინელების მხარდამხარ მებრძოლი ქართველი გმირების გამარჯვებით დასრულდება.