გრიგოლ რობაქიძის სახელობის უნივერსიტეტი მდგრადი განვითარების საკითხების შესწავლას განსაკუთრებულ ყურადღებას უთმობს.

ამის შესახებ ინფორმაციას გრიგოლ რობაქიძის სახელობის უნივერსიტეტი ავრცელებს.

„მდგრადი განვითარების საკითხების შესახებ ცნობიერების დონე ჯერ კიდევ დაბალია საზოგადოებაში და მათ შორის, სტუდენტებსა და მოსწავლეებშიც, ამიტომ ამ საკითხების სწავლებას განსაკუთრებულ ყურადღებას უთმობს გრიგოლ რობაქიძის სახელობის უნივერსიტეტის ეკონომიკისა და ბიზნესის სკოლა, რომელსაც ხელმძღვანელობს რექტორის მოადგილე ვახტანგ ჭარაია.

უნივერსიტეტმა ეკონომიკისა და მდგრადი განვითარების სამინისტროსთან ერთად დაგეგმა ამ საკითხების განხილვა, „მდგრადი განვითარება: სიახლეები და გამოწვევები“ უნივერსიტეტის ყველაზე მასშტაბური პროექტის - Teen Academy, ფარგლებში განხორციელდება. მოსწავლეები გაეცნობიან შემდეგ საკითხებს: 1. მდგრადი ეკონომიკური განვითარება. 2. სოციალური პასუხისმგებლობა. 3. სოციალური საწარმო. 4. ნარჩენების მართვა. 5. განახლებადი ენერგიები. 6. მდგრადი ტურიზმი. 7. პროექტის წერა და პრეზენტაცია და სხვ. პროექტის ფარგლებში მოსწავლეები მათთვის ყველაზე საინტერესო თემის შესახებ მოამზადებენ და წარმოადგენენ პროექტს, რომელსაც შეაფასებს ჟიური. გამარჯვებული პროექტის ავტორებს გადაეცემათ სპეციალური პრიზები. პროექტში ჩართული იქნებიან როგორც გრიგოლ რობაქიძის სახელობის უნივერსიტეტის აკადემიური და მოწვეული პერსონალი, ისე ეკონომიკის სამინისტროსა და ბიზნესსექტორის წარმომადგენლები.

უნივერსიტეტში პირველი შეხვედრა მოსწავლეებთან ამ საკითხებზე დღეს, 2023 წლის 26 თებერვალს, გაიმართა“, - ნათქვამია ინფორმაციაში.