ნაზი ჯანეზაშვილი - ეს არის რუსული კანონი და დაინიცირებულია იმისთვის, რომ სამოქალაქო საზოგადოებას და მედიას, რომელიც საერთაშორისო დონორი ორგანიზაციებისგან ფინანსდება, პრობლემები შეუქმნან
ვფიქრობ, ეს არის რუსული კანონი და დაინიცირებულია იმისთვის, რომ სამოქალაქო საზოგადოებას და მედიას, რომელიც საერთაშორისო დონორი ორგანიზაციებისგან ფინანსდება, პრობლემები შეუქმნან,- ამის შესახებ ორგანიზაცია „საქართველოს სასამართლო გუშაგის" ხელმძღვანელმა ნაზი ჯანეზაშვილმა ჟურნალისტებთან განაცხადა, რითაც პარლამენტში ინიცირებულ „უცხოური გავლენის გამჭვირვალობის“ შესახებ და „უცხოელი აგენტების რეგისტრაციის“ შესახებ კანონპროექტებთან დაკავშირებით განაცხადა.
მისი თქმით, მსგავსი კანონის მიღება მასშტაბურ პრობლემებს გამოიწვევს.
„ვსაუბრობთ იმაზე, თუ რა იგეგმება, რა პროცესებია პარლამენტში და ვუზიარებთ ჩვენს მოსაზრებებს „ლელოს“ წარმომადგენლებს. იმედი მაქვს, პარლამენტი მხედველობაში მიიღებს იმ პროტესტს, რაც საზოგადოებაში არსებობს, რადგან ეს რუსული კანონი შეეხება ყველა იმ ორგანიზაციას, რომელიც საქართველოში წლების განმავლობაში ახორციელებდნენ ძალიან მნიშვნელოვან პროექტებს, მათ შორის, საუბარია ისეთ ორგანიზაციებზე, რომლებსაც საერთოდ არ აქვს „ვოჩ-დოგური“ საქმიანობა და ადგილობრივ დონეზე ეხმარებიან სხვადასხვა კუთხით მოსახლეობას და ახორციელებენ აქტივობებს. ამ კანონის მიღება იმდენად მასშტაბურ პრობლემებს გამოიწვევს, რომ იმედი მაქვს პარლამენტი მიიღებს წინააღმდეგობას მხედველობაში, რაც საზოგადოებაში ფიქსირდება”,- განაცხადა ჯანეზაშვილმა.
ცნობისთვის, "ლელო" პარლამენტში ინიცირებულ "უცხოური გავლენის გამჭვირვალობის" შესახებ და "უცხოელი აგენტების რეგისტრაციის" შესახებ პროექტებთან დაკავშირებით სამოქალაქო საზოგადოებასთან შეხვედრებს მართავს.
