„ქართული ოცნება“ არის ის პოლიტიკური გუნდი, რომელმაც 2008 წლის ომში ქართველი ჯარისკაცების სიმართლე საერთაშორისო სასამართლოებში დაამტკიცა, - ამის შესახებ საქართველოს პარლამენტის თავმჯდომარის მოადგილემ, არჩილ თალაკვაძემ განაცხადა.
როგორც მან აღნიშნა, პარლამენტს არ აქვს ინიციატივა, რომ 2008 წლის ომზე გამოძიება დაიწყოს.
„ქართული ოცნება“ არის ის პოლიტიკური გუნდი და ის ხელისუფლება, რომელმაც საერთაშორისო სასამართლოებში მნიშვნელოვანი სამართლებრივი დავები მოიგო და დაამტკიცა ქართველი ჯარისკაცების სიმართლე. ჩვენ დავამტკიცეთ, რომ ჩვენს ჯარისკაცებს მშვიდობიან მოსახლეობაზე შეტევა არ დაუწყიათ. სამწუხაროდ, ევროსაბჭოს რეზოლუციაში სააკაშვილმა და მისმა გუნდმა დაადანაშაულა საკუთარი ქვეყანა. კითხვები, რის გამოც 2008 წლის ომის გამოძიება სურთ, მიხეილ სააკაშვილთან არსებობს.
პარლამენტს არ აქვს ინიციატივა, რომ 2008 წლის ომზე გამოძიება დაიწყოს. მიზანი იყო, რომ საქართველოს სიმართლე დაგვემტკიცებინა და ჩვენ ეს საერთაშორისო სასამართლოებში შევძელით“, - განაცხადა არჩილ თალაკვაძემ.
