ყველა საერთაშორისო ორგანიზაციამ ალბათ, უნდა მოუწოდოს მიხეილ სააკაშვილს, რომ თავი დაანებოს თვითდაზიანების პოლიტიკას, - ამის შესახებ საპარლამენტო უმრავლესობის წევრმა ირაკლი ქადაგიშვილმა განაცხადა, რითაც Amnesty International-ისა და Human Rights Watch-ის ერთობლივ განცხადებას გამოეხმაურა.

მისივე თქმით, სააკაშვილის მკურნალობა და მისი ჯანმრთელობის ნორმალური კონდიცია მხოლოდ იმაზეა დამოკიდებული, მიიღებს თუ არა თავად საჭირო კალორიებს.

"მიხეილ სააკაშვილის მკურნალობა სახელმწიფოს მხრიდან სრულად უზრუნველყოფილია. ერთადერთი, რაც ალბათ, ყველა საერთაშორისო ორგანიზაციამ უნდა მოუწოდოს მიხეილ სააკაშვილს არის ის, რომ მან თავი დაანებოს კანონის უხეშად დარღვევას და თვითდაზიანების პოლიტიკის გატარებას. ეს არის ერთადერთი, რადგან მისი მკურნალობა და ჯანმრთელობის ნორმალურ კონდიციაში ყოფნა მხოლოდ და მხოლოდ იმაზეა დამოკიდებული, შეწყვეტს თუ არა თვითდაზიანების პროცედურებს და მიიღებს თუ არა იმ სტანდარტულ კალორიებს, რაც ელემენტარულად ნორმალური ფუნქციონირებისთვის სჭირდება ადამიანს,"- განაცხადა ქადაგიშვილმა.

Amnesty International-ისა და Human Rights Watch-ის ერთობლივ განცხადებაში აღნიშნულია, რომ პატიმრობა არ უნდა ნიშნავდეს სასიკვდილო განაჩენს და საქართველოს ხელისუფლებამ უნდა განიხილოს მიხეილ სააკაშვილის სამედიცინო ნიშნით გათავისუფლება.