ITB ბერლინის ტურისტულ გამოფენას საქართველო გრანდიოზული კონცერტით გახსნის. ამის შესახებ ინფორმაციას ტურიზმის ეროვნული ადმინისტრაცია ავრცელებს.

მათივე ცნობით, გალა გახსნაში მონაწილეობას ქართული ეროვნული ბალეტი „სუხიშვილები“ მიიღებს.

ქართველი ხელოვანები City Cube-ის პავილიონში 3 ათასამდე მაყურებელს საქართველოს კულტურას გააცნობენ.

„ძალიან მნიშვნელოვანი გამოფენაა საქართველოსთვის ბერლინში, ვმონაწილეობთ „სუხიშვილები“, რაც ძალიან გვახარებს, რომ ჩართულები ვართ ამ დიდ ღონისძიებაში.

წარვადგენთ სხვადასხვა ცეკვას, განახლებულ სამაიას, ასევე ცდოს, ზეკარსა და ჯუთას. ეს ჩვენთვის ძალიან მნიშვნელოვანი კონცერტია, რადგან მრავალათასიანი აუდიტორია გაეცნობა ჩვენს კულტურას“, - აცხადებს ანსამბლ “სუხიშვილების” მოცეკვავე ნათია ბაკურაძე.

საქართველოს ტურიზმის ეროვნული ადმინისტრაციის ცნობით, ITB Berlin 2023-ზე საქართველო წელს მასპინძელი ქვეყნის სტატუსით წარდგება. გამოფენაზე საქართველოს მთავარი კონცეფციაა „უსაზღვრო სტუმარმასპინძლობა“.

2019 წელს მსოფლიოში ერთ-ერთ უდიდესს ტურისტულ გამოფენას 181 ქვეყნიდან 160 ათასზე მეტი ვიზიტორი ჰყავდა. გამოფენას საერთაშორისო მედიის 5 ათასამდე წარმომადგენელი აშუქებდა.