ახლა „ქართული ოცნება“ თავისი ზონდერჯგუფებით, სუს-ით შეეცდება ალყაში მოაქციოს პარლამენტის საკომიტეტო დარბაზი და ისევ ფარულად, ჩუმად ჩაატაროს საკომიტეტო მოსმენა. ამიტომ, ჩვენ ტაქტიკა უნდა შევიმუშაოთ - ყველაფერი უნდა გავაკეთოთ იმისათვის, რომ წინ აღვუდგეთ ამ კანონის ამ ფორმით მიღებას, - ამის შესახებ „ნაციონალურ მოძრაობის“ ერთ-ერთმა წევრმა პეტრე ცისკარიშვილმა ჟურნალისტებს განუცხადა, როდესაც ისაუბრა „ხალის ძალის“ მიერ ინიცირებულ კანონპროექტზე „უცხოური გავლენის აგენტების შესახებ

მისი თქმით, ამ კანონთან დაკავშირებით „ქართული ოცნების“ წევრები ზუსტად იმ სიტყვებით საუბრობენ, რითაც თავის დროზე საუბრობდა რუსეთის პრეზიდენტი, ვლადიმერ პუტინი იმისათვის, რომ რუსული საზოგადოების წინაშე გაემართლებინა „ეს მართლაც მახინჯი, არადემოკრატიული და დრაკონული კანონი“.

ცისკარიშვილის თქმით, თუ როგორ გაუწევენ წინააღმდეგობას ამ კანონის მიღებას, ამაზე წინასწარ ვერ ისაუბრებს.

„ორშაბათს გრძელდება საკომიტეტო განხილვა. ალბათ, მომავალი კვირის განმავლობაში იქნება მოსმენები პლენარულ სხდომაზე. აქედან გამომდინარე, ჩვენ წინასწარ ზუსტად არაფერს გეტყვით იმიტომ, რომ „ოცნება“ ცდილობს ამ დღეებისთვის მოემზადოს. ისინი შეიძლება მიიჩნევენ კიდევაც, რომ გუშინწინ, საკმარისად „მომზადებულები“ არ იყვნენ და ჩვენებმა ძალიან მაგარი წინააღმდეგობა გაუწიეს, შეაფერხეს კანონპროექტის განხილვა. ახლა ისინი თავიანთი ზონდერჯგუფებით, სუს-ით შეეცდებიან ალყაში მოაქციონ პარლამენტის საკომიტეტო დარბაზი და ისევ ფარულად, ჩუმად ჩაატარონ ეს საკომიტეტო მოსმენა. აქედან გამომდიოდა, ჩვენ ტაქტიკა უნდა შევიმუშაოთ სხვა პარტიებთან, არასამთავრობო ორგანიზაციებთან, სამოქალაქო საზოგადოებასთან, სტუდენტებთან ჩვენ მხარდამჭერებთან ერთად. ყველაფერი უნდა გავაკეთოთ იმისთვის, რომ წინ აღვუდგეთ ამ კანონის ამ ფორმით მიღებას. ჩვენი გეგმა, ქართველი ხალხის, არასამთავრობო ორგანიზაციების, სხვა პარტიების და ყველას გეგმა არის საქართველოს გადარჩენა რუსული რეჟიმისგან. ტაქტიკურად, რა, როდის და როგორ განხორციელდება, ამას დრო გვაჩვენებს“, - განაცხადა ცისკარიშვილმა.