კულტურის სფეროდან გათავისუფლებულებმა ე.წ. უცხოური გავლენის აგენტების შესახებ კანონპროექტი გააპროტესტეს

თბილისში, მრგვალ ბაღში კულტურის სფეროდან სხვადასხვა დროს გათავისუფლებულებმა ე.წ. უცხო ქვეყნის გავლენის აგენტების შესახებ კანონპროექტის წინააღმდეგ აქცია გამართეს.

ადგილზე შეკრებილები ხელისუფლებას მოუწოდებენ აღნიშნული კანონპროექტი არ მიიღოს.

ხელოვნებათმცოდნე, ეკა კიკნაძის განცხადებით, ამ კანონის მიღება ანტიკონსტიტუციური და ანტისახელმწიფოებრივი საქციელია.

„მე და ჩემმა კოლეგებმა საკუთარ თავზე გამოვცადეთ, თუ რას ნიშნავს სახელმწიფოს მხრიდან მოქალაქის დევნა. ამისთვის ეს კანონი კიდევ უფრო მეტ დახვეწილ ბერკეტს შეიმუშავებს და ქვეყანაში დამცველი არავინ იქნება, რომელიც დევნილ ადამიანს გვერდით დაუდგება. ამიტომ მიგვაჩნია, რომ კანონი არადემოკრატიულია და ის ემსახურება საქართველოში პუტინის ავტოკრატიული მოდელის დამკვიდრებას. მიგვაჩნია, რომ ამ კანონის მიღება ანტიკონსტიტუციური და ანტისახელმწიფოებრივი საქციელია“, - განაცხადა ეკა კიკნაძემ.