გიორგი ვაშაძე - ზუსტად იმავე შეტყობინებებითა და ტექსტებით შემოაქვთ კანონი, რითაც 2012 წელს პუტინმა რუსეთში შეიტანა - ადამიანებს, რომლებიც დღეს ხელისუფლებაში არიან, მალე ევროკავშირში გადაადგილება შეეზღუდებათ

„სტრატეგია აღმაშენებლის“ ლიდერის, გიორგი ვაშაძის განცხადებით, სპეცრაზმების ზურგს უკან ამოფარებული ხელისუფლების წარმომადგენლები კანონს ძალადობით იღებენ და ამით რუსულ ინტერესებს ატარებენ.

როგორც გიორგი ვაშაძემ ჟურნალისტებთან აღნიშნა, ამ კანონთან მიმართებით, 2012 წელს პუტინის ნათქვამ სიტყვებსა და 2023 წელს საქართველოში ირაკლი კობახიძის ნათქვამ სიტყვებს შორის სხვაობა ნულოვანია.

მისივე თქმით, ადამიანებს, რომლებიც დღეს საქართველოს ხელისუფლებაში არიან, მალე ევროკავშირში გადაადგილება შეეზღუდებათ.

„ასეთი პრეცედენტი, რაც ახლა საქართველოს პარლამენტში ხდება, მსოფლიოში არ არსებობს. ასეთი რამ აფრიკის ქვეყნებში არ ხდება. სპეცრაზმების ზურგს უკან ამოფარებული ხელისუფლების წარმომდგენლები, რომლებიც კანონს ძალადობით იღებენ. ეს კანონი პირდაპირ რუსულ ინტერესებს ატარებს. მას ჩვენს კონსტიტუციასა და ეროვნულ ინტერესებთან არანაირი საერთო არ აქვს.

ზუსტად იმავე შეტყობინებებითა და ტექსტებით შემოაქვთ ეს კანონი, რითაც 2012 წელს ის პუტინმა რუსეთში შეიტანა. მილიონობით ნახვა აქვს უკვე პუტინისა და კობახიძის გამეორებულ სიტყვებს. სხვაობა ნულოვანია. თავიდან ბოლომდე ამით ვამტკიცებთ, რომ რუსულ ინტერესებს ატარებენ.

გარდა ამისა, როდესაც მთელი ევროპა, მთელი დასავლეთი გვეუბნება, რომ თუ ამ კანონს მივიღებთ, მათთან საერთო არ გვექნება, ესეც „ორჯერ ორი ოთხია“.

ჩვენ ბრძოლის გაგრძელებას ვაპირებთ. მთავარი რაც გავაკეთეთ, მთელი საქართველოსა და მთელი მსოფლიოს ყურადღება მივიპყრეთ და გავაგებინეთ, თუ ვისთან აქვთ საქმე. ამ ადამიანებს, რომლებიც დღეს საქართველოს ხელისუფლებაში არიან, დარწმუნებული ვარ, მალე ევროკავშირში გადაადგილება შეეზღუდებათ“, - განაცხადა გიორგი ვაშაძემ.