აშშ-ის სახელმწიფო მდივანმა, ენტონი ბლინკენმა და ლიეუტვის საგარეო საქმეთა მინისტრმა, გაბრიელუს ლანდსბერგისმა კიდევ ერთხელ დაადასტურეს შეერთებული შტატებისა და ლიეტუვის ურყევი მხარდაჭერა უკრაინის მიმართ, რომელიც იცავს საკუთარ ტერიტორიას და დემოკრატიას რუსეთის სასტიკი და არაპროვოცირებული შეჭრისგან, - ამის შესახებ ენტონი ბლინკენისა და გაბრიელუს ლანდსბერგისის ერთობლივ განცხადებაშია აღნიშნული, რომელიც ვაშინგტონში გამართული შეხვედრის შემდეგ გამოქვეყნდა.

„ორი ლიდერი მოწოდებულია, გააგრძელოს რუსეთისთვის მძიმე ეკონომიკური ხარჯების დაწესება სანქციების გზით და რუსეთის მიერ განხორციელებულ თავდასხმებზე პასუხისმგებელი პირებისთვის პასუხისმგებლობის დაწესება. მათ ასევე პირობა დადეს, რომ გააგრძელებენ მხარდაჭერას, რომელიც უკრაინას სჭირდება თავისი ხალხის ტანჯვის შესამსუბუქებლად და მისი სუვერენიტეტისა და ტერიტორიული მთლიანობის დასაცავად მანამ, სანამ უკრაინა არ გაიმარჯვებს, ხოლო მოკავშირეებსა და პარტნიორებს იგივესკენ მოუწოდებენ“, - აღნიშნულია განცხადებაში.

ენტონი ბლინკენმა და გაბრიელუს ლანდსბერგისმა კიდევ ერთხელ მოუწოდეს რუსეთს, დაუყოვნებლივ შეწყვიტოს აგრესიული ომი უკრაინის წინააღმდეგ და გაიყვანოს მთელი თავისი ძალები და სამხედრო ტექნიკა უკრაინის ტერიტორიიდან.